Kryeministri Edi Rama, kësaj radhe në Twitter, sulmoi sërish drejtuesin e sindikatës së pedagogëve, Sandër Kovaçin.
“Krenar që ka qenë shiks i kohës së zezë të 97-ës le të jetë sa të dojë, po një shiks i maskuar si sindikalist për të importuar zullumin e nongratave e të rublave në hapësirën universitare, s’ka asnjë shans të merret seriozisht në kërkesat e tij fyese për këtë situatë lufte”, shkruan Rama në rrjetet sociale.
Më herët, kreu i qeverisë, nga Gjirokastra ku po vijon takimet që ngjajnë fort me një fushatë elektorale, theksoi: “Një figurë e thjeshtë e SHIK-ut, e atij SHIK-ut famëkeq, nuk mund të japi orientim dhe nuk mund të imponohet dot bashkë me një zinxhir foltorexhinjsh që kanë ngatërruar punën që kanë në universitet, me foltoren për turpin e tyre bëjnë protesta për të çuar ujin në mullirin e rublave, e çorbës së rublave e të non-gratave dhe të spiunëve të fshehur 30 vjet. Ta harrojnë se do kenë një rritje tjetër”.
Kovaçi, pas sulmeve të Ramës, sqaroi se ka qenë pjesë e Shërbimin Informativ, duke shtuar se kur mbante atët pozicion, ka marrë vlerësim nga vetë Rama.
“E kam për nder që kam kontribuuar për atë institucion për një periudhë më shumë se 2-vjeçare dhe kam punuar për atë kryeministër dhe ka marrë shpërblim ai departament për punën e shkëlqyer nga Rama. E quaj për nder që kam punuar në një institucion serioz dhe shpresoj që të jetë dhe sot një institucion serioz”, tha Kovaçi për mediat.
Ai më tej sqaroi se ndërpreu marrëdhënien e punës në SHISH për të ndjekur karrierën akademike.
Kovaçi u shpreh se Rama po tenton të intimidojë me deklaratat e tij, ndërsa u shpreh i vendosur për vijimin e protestave. Kryeministri duhet të rrisë pagat e pedagogëve nëse do që protesta të ndërpritet, shtoi ai.
