Nga Boldnews.al
Ilir Beqja, një prej ministrave më të akuzuar për korrupsion gjatë qeverisjes së Edi Ramës, u shfaq në krah të shefit të tij dhe ministres së Arsimit, Evis Kushi, në një takim me rektorët e universiteteve të Shqipërisë.
Qëllimi zyrtar i takimit ishte rritja e performancës së shkollave të larta, ndërkohë që e vërteta që fshihet pas saj është tentative e kryeministrit Rama për të sfumuar grevën e pedagogëve, të cilët kërkojnë trajtim më dinjitoz financiar.
Një pjesë e rëndësishme e takimit ndërmjet kreut të qeverisë dhe rektorëve e zuri fjala e Ilir Beqjas, i cili mban prej pak kohësh postin e drejtuesit të Agjencisë së Planifikimit Strategjik të Ndihmës së Huaj.
Për opozitën, ky institucion i krijuar nga Rama në vitin 2021, është “një mekanizëm për të vjedhur fondet e BE”.
Kjo bindje iu forcua më shumë opozitës, kur në krye të saj u emërua Ilir Beqja.
Ai ishte ministër i Shëndetësisë në mandatin e parë të Edi Ramës, në periudhën 2013-2017.
Gjatë asaj kohe, ministria e Shëndetësisë miratoi disa koncesione shumë të debatueshme, të cilat u kushtojnë qindra milionë euro taksave të qytetarëve shqiptarë.
Nën drejtimin e tij, u miratua kontrata koncesionare të Kontrolli Bazë (Check Up), Hemodializës, Laboratorëve dhe Sterilizimin e seteve kirurgjikale.
Për të gjitha këto kontrata koncesionare, Ilir Beqja është kallëzuar pranë Strukturës së Posaçme Anti-Korrupsion (SPAK), një institucion i krijuar pas miratimit të Reformës në Drejtësi, me objekt hetimin e korrupsionit në radhët e zyrtarëve të lartë.
Nga sa mësohet nga burime brenda SPAK-ut, hetim po zhvillohet vetëm për procedurat e dhënies me koncesion të shërbimit të sterilizimit të seteve kirurgjikale, bazuar në një kallëzim të dorëzuar në verën e vitit 2020 nga “Nisma Thurje”.
Pas më shumë se dy vitesh, Prokuroria Speciale ende nuk ka arritur në një konkluzion nëse ekzistojnë ose jo shkeljet penale.
Veprimet e prokurorëve specialë janë shumë të ngadalta, përkundër pritshmërive të opinionit publik mbi hetimin e korrupsionit të zyrtarëve të lartë.
Në Korrik 2022, pra më shumë se 24 muaj nga kallëzimi, Ilir Beqja u thirr për të dhënë deklarimet e tij para oficerëve të Policisë Gjyqësore të SPAK-ut.
Pak orë para tij, në dyert e Prokurorisë Speciale ishte paraqitur edh eish-zëvendësi i tij në Ministrinë e Shëndetësisë, Klodjan Rjepaj.
Këto lëvizje të verës krijuan idenë se SPAK-u tashmë kishte ndezur motorët dhe mund të arrinte në një konkluzion sa më të shpejtë, të paktën për njërin prej 4 koncesioneve e shumëdebatuar në Sektorin e Shëndetësisë.
Por, siç “vapa ikën me Gushtin”, edhe veprimet e Prokurorisë së Posaçme u rikthyen apatike pas përfundimit të stinës së verës.
Tashmë që Ilir Beqja pritej të kalonte më shpesh dyert e drejtësisë, ai shfaqet përballë rektorëve, duke u dhënë leksione për mënyrën e menaxhimit financiar të universiteteve.
