Deputetja e Partisë së Lirisë, Erisa Xhixho me anë të një deklarate për mediat tha se Rama në vend që të jepte zgjidhje për protestën e drejtë të pedagogëve vendosi t’i kërcënojë.
“Sot kryeministri, në vend që të jepte zgjidhje për protestën e drejtë të pedagogëve që vazhdon me javë, vendosi t’i kërcënojë. Në vend që të merrte vendime e të bënte gjithçka që të rinjtë të qëndrojnë në Shqipëri, u ofroi alternativë bangladeshasve universitarë”, shprehet Xhixho.
Ajo deklaroi se asnjë fjalë nuk u tha sot për studentët që përballen me rritje të qirasë së shtëpive.
“Ndërkohë që bën rritje qesharake të pagave të pedagogëve, në fakt rritjen ia faturon universiteteve tona të vafra. Asnjë fjalë nuk u tha sot për studentët që përballen me rritje të qirasë së shtëpive që shkojnë deri 300-400 euro, rritja e çmimeve të ushqimeve, transportit, veshjeve etj. Studentët prej javës kërkojnë më të drejtë të mbështeten me 100 euro pagesë mujore, sa bashkëmoshatarët e tyre në Kosovë. Pra gjithë mbështetja e kërkuar nuk është sa Anglia dhe as sa Franca, por sa Kosova. Po Kosova sot jep 100 euro në muaj për çdo student për të përballuar kostot e rritura të jetesës, ndërkohë qeveria shqiptare që ka dhënë 0 mbështetje, u tregon derën dhe jep alternativën e mbushjes së auditorëve me bangladeshas”, ka deklaruar deputetja.
Ajo i bëri thirrje qeverisë që të lërë kërcënimet dhe presionet që janë të papranueshme dhe që nuk trembin askënd, por të plotësojë kërkesat e drejta të pedagogeve dhe studentëve.
“Qeveria t’i lërë kërcënimet dhe presionet që janë të papranueshme dhe që nuk trembin askënd, por të plotësojë kërkesat e drejta të pedagogeve dhe studentëve. Mbështetja jonë për protestën është e plotë dhe jemi në krah të studentëve dhe pedagogëve. Nuk mundet që pedagogët dhe studentët të paguajnë që Edi Rama dhe qeveria të vjedhin miliona. Plotësoni kërkesat e studentëve dhe pedagogëve që sa më parë të normalizohet jeta akademike në vend”, përfundon Xhixho.
