Qeveria është tërhequr nga paketa “antishpifje” të cilën e mbante të ngrirë në Kuvend. Këtë e konfirmoi këtë të Martë nga Fieri kreu i grupit parlamentar të PS-së, Taulant Balla.
Megjithatë, Balla tha se në të ardhmen “do të duhet të mendojmë” për mekanizmat për të parandaluar rënien e pushtetit të katërt në financime të paligjshme.
“Ndryshimet në ligjin për mediat që kanë të bëjnë me shpifjen janë tërhequr Nga propozuesit, kështu që e gjithë inisiativa ligjore ka rënë. Ne i kemi tërhequr ato ndryshime ligjore të bëra këtu e tre vite më parë. Por natyrshëm në kushtet që jemi kemi një rrezik të vazhdueshëm që vjen në mbështetje të dezinformimit dhe sponsorizohet me rublat ruse. Së fundi dhe në raportet që u publikuan u tha qartë se Rusia ka ndikuar në minimin e demokracisë duke sponsorizuar forca të ndryshme politike por edhe duke financuar mediat. Ky pushtet i katërt nuk duhet të bjerë në financime të paligjshme nga aktorë të cilët minojnë demokracinë. Po është tërhequr dhe na duhet që në të ardhmen të mendojmë mekanizmat sesi të mbrojmë demokracinë duke mbrojtur financime nga aktorë jomiqësorë në Shqipëri dhe Europë. Agresioni rus është një luftë me demokracinë dhe Shqipëria është pjesë e kësaj lufte”, tha Balla.
Ligji për mediat u kundërshtua nga Komisioni i Venecias, BE, rrjetet ndërkombëtare të mbrojtjes së gazetarëve, Komisioni Europian, Federata Europiane e Gazetarëve, dhe Qendra Europiane për Lirinë e Medias dhe të Shtypit. Ato reaguan ashpër duke e konsideruar si censurim të lirisë së shprehjes.
