Ditën e sotme nis ndryshe viti i ri akademik 2022-2023.
Pedagogët kanë njoftuar se sot me nisjen e vitit akademik do të jenë në Univeristete nga ora 08:00 deri në orën 10:00, ku do të mirëpresin studentët e vitit të parë dhe më pas do të vijojnë protestën e tyre.
Protesta pritet që të nisë në orën 10:00. Sindikatat dhe profesorët e universiteteve publike të Shqipërisë kanë njoftuar se nuk do të nisin vitin akademik, nëse qeveria nuk plotëson 9 kërkesat e peticionit të tyre mes tyre dhe më e rëndësishmja rritja e pagave.
Pedagogët kërkojnë rritje 50 për qind të pagave bazë sipas titujve shkencorë në dy faza, vlerësime për vjetërsinë në punë mbi 15 vjet dhe për orët e mbingarkesës shtesë në mësimdhënie, rritje të financimit për kërkimin shkencor, rivlerësim të orës mësimore leksion e seminar, rishikim të tatimit prej 23% mbi pagesën e ngarkesës shtesë, si dhe transparencë mbi buxhetin dhe të ardhurat e universiteteve publike.
Ditët e fundit pedagogë të ndryshëm u kanë bërë thirrje studentëve që tu bashkohen në protestën e tyre për një pagë më të lartë dhe për arsim më cilësor.
Kujtojmë që pedagogët kanë refuzuar propozimin e kryeministrit Edi Rama për rritjen me 7% të pagave, pasi i kërkojnë qeverisë që të ngrejë nivelin e pagesës njësoj me vendet e tjera të rajonit.
