I ftuar në studion e “Fax News”, analisti Edvin Kulluri foli mbi fjalimin e bujshëm të kryeministrit Rama që shkaktoi shumë polemika si tek ndërkombëtarët ashtu dhe brenda vendit.
Sipas Kullurit, Rama nuk mbajti një qëndrim me retorikën e tij por kishte tendencë prodhimin e lajmeve, si një mënyrë për të shmangur vëmendjen nga problemet e shumta që ka sot ekonomia shqiptare.
“Gjuhë e ashpër, e vrazhdtë, cinike e pse jo dhe e paedukatë në momente të caktuara. Mënyra si iu drejtua eurodeputetes greke ishte e tepërt, duhet të dimë se e folura në këto ambiente duhet të jetë etike dhe e përmbajtur por për Ramën më shumë rëndësi ka lajmi sesa mungesa e etikës. Ai shquhet për të dalë nga situata e vështirë duke prodhuar lajm të paqenë, sepse në fund të fundit debati për rezolutë është debat i vjetër dhe mos të harrojmë se kemi në Hage ish-krerë të UÇK-së dhe gjyqi është procedurë.
Patjetër të gjithë shqiptarët duhet të ndihen keq për këtë gjyq sepse dhe raporti i Dick Marty është i “qepur” keq, s’kam parë prova. Greva e pedagogëve, kriza energjetike s’ka mbaruar, gropa në buxhet, edhe niveli i lartë i borxhit publik e të gjitha këto probleme në 9 vite qeveri, ky është kryeministër që qeveris keq. Nuk të bën të suksesshëm marrja e votave. Për të prodhuar lajm ishte fjalimi, jo për të mbajtur qëndrim, ai gjithmonë bën “show” në forumet ndërkombëtare. Edhe retorika që përdor, duke u futur dhe në raportet Greqi-Turqi, trazon ujëra që s’mund t’i qetësojë. Pra po bën mistrecin provincial dhe më pas s’ka takat të përballet me përgjegjësitë.
Nuk mund të bëhemi shkas për rivalitete, kemi dhe çështjen e detit në mes, mund të tensionohen marrëdhëniet mes dy vendeve. Këto protagonizma janë të dëmshme për imazhin e tij, por i bëjnë mirë brenda vendit sepse ju e keni parë dhe opozita pati reagime pas fjalimit”-tha Kulluri
