Policia e Vlorës ka arrestuar një 30-vjeçar dhe ka shpallur në kërkim autorin e dyshuar për plagosjen e Sebastiano Jallajt.
Sipas njoftimit të uniformave blu, në pranga ka përfunduar shtetasi me iniciale K. M, banues në Llaktund, i cili ka thyer masën e sigurisë “Arrest në shtëpi”, për veprën penale “Prodhimi dhe shitja e narkotikeve”, si dhe nuk ka kallëzuar krimin. Gjithashtu policia ka shpallur në kërkim shtetasin me inciale D. T (20 vjeç), për veprat penale “Plagosja e rëndë me dashje” dhe “Mbajtja pa leje e armëve dhe e municionit luftarak”.
“Shërbimet e Komisariatit të Policisë Vlorë, në bashkëpunim dhe me strukturat e tjera të DVP Vlorë, pas veprimeve të para hetimore, në lidhje me ngjarjen e ndodhur mbrëmjen e djeshme, në fshatin Llakatund, ku mbeti i plagosur me armë zjarri në këmbë, shtetasi S. J., falë veprimeve të shpejta kanë bërë të mundur identifikimin dhe shpalljen në kërkim të autorit të dyshuar, shtetasit:
– D. T., 20 vjeç, banues në fshatin Llakatund, për veprat penale “Plagosja e rëndë me dashje” dhe “Mbajtja pa leje e armëve dhe e municionit luftarak”.
Shtetasi D. T. dyshohet se pas një konflikti të çastit, për motive të dobëta, ka goditur me armë zjarri, shtetasin S. J., 19 vjeç, banues në Fier, i cili aktualisht ndodhet në spital, jashtë rrezikut për jetën. Gjatë këtij konflikti, së bashku me 19-vjeçarin, kanë qenë të pranishëm dhe 2 shtetas të tjerë, K. M. dhe P. K.
Në vijim të veprimeve u bë arrestimi në flagrancë i shtetasit K. M., 30 vjeç, banues në fshatin Llaktund, Vlorë, pasi ka thyer masen e sigurisë “Arrest në shtëpi”, për veprën penale “Prodhimi dhe shitja e narkotikeve”, si dhe nuk ka kallëzuar krimin.
Gjithashtu u proceduan në gjendje të lirë, për veprën penale “Moskallëzimi i krimit”, shtetasit P. K., 40 vjeç dhe S. J., 19 vjeç (i dëmtuari), pasi nuk kanë treguar për rrethanat e ngjarjes”, njofton policia e Vlorës.
Vijon puna për kapjen dhe vënien përpara përgjegjësisë ligjore të autorit të dyshuar. Materialet iu referuan Prokurorisë, për veprime të mëtejshme.
Por si ndodhi ngjarja?
Sebastian Jallaj banues në Fier ka shkuar në Llakatund ku ka dhe të afërmit e tij (është nip aty). 19 vjeçari ka patur një zënkë me 20 vjeçarin dhe ka shkuar për ta diskutuar.
Është ulur fillimisht në lokalin e fshatit dhe është përplasur sërish me 20 vjeçarin.
Autori pas debatit me fjalë ka shkuar në shtëpi ku ka marrë armën e llojit pistoletë. Në momentin që Sebastian Jallaj ka qenë duke zbritur nga lokali ky e ka qëlluar me pistoletë në këmbë. Më pas është larguar. Jallaj është transportuar në spital me makinë të rastit.
Rreth 15 persona janë pyetur dhe kanë qenë të shoqëruar në komisariat për ngjarjen. Mes tyre personi që e dërgoi në spital, familjarë të autorit, dëshmitarë okular.
