Policia italiane në Varese ka arrestuar mbrëmjen e djeshme një shtetas shqiptar në kërkim nga drejtësia shqiptare.
Një postbllok policie ndaloi shqiptarin, identiteti i të cilit nuk bëhet me dije, në automjetin e tij, një Mercedes, teksa po udhëtonte në Viale Belforte.
Pas kontrollit, agjentët zbuluan se ai ishte person në kërkim nga autoritetet shqiptare dhe kishte një urdhër arresti ndërkombëtar për ekstradim të lëshuar nga Gjykata e rrethit Lezhë.
Ai akuzohet për vrasje dhe prodhim të paligjshëm të armëve dhe municionit, akuza që u konfirmuan më tej nga Shërbimi i Bashkëpunimit Ndërkombëtar Policor i Departamentit të Sigurisë Publike, i kontaktuar nga policia e Komisariatit të Policisë.
Nisur nga kjo, agjentët italianë arrestuan shqiptarin, i cili u shoqërua në burgun lokal në pritje të ekstradimit.
