Kreu i Partisë së Lirisë, Ilir Meta ka reaguar pasi qeveria e Kosovës ditën e sotme miratoi vendimin për të dhënë 100 euro shtesë për çdo pensionist gjatë muajit tetor në mënyrë që kjo shtresë të përballojë rritjen galoponte të çmimeve si pasojë e krizës ekonomike.
Gjatë një postimi në rrjetet sociale, Meta shkroi “ndihma e Qeverisë Rama për pensionistët nuk është as sa një kafe në ditë, sepse paratë ajo i shpërdoron dhe i vjedh për inceneratorët dhe koncensionet”, ndërsa shtoi se për pensionistët në Shqipëri jetesa është e papërballueshme.
“Pas Maqedonisë së Veriut, edhe Qeveria e Kosovës ndërmerr hapa konkretë për të mbështetur shtresat në nevojë për përballimin e krizës së rritjes së çmimeve dhe inflacionit të lartë.
100 euro shtesë do të jetë shuma që do të përfitojnë pensionistët në Kosovë gjatë muajit tetor.
Po në Shqipëri? Ndihma e Qeverisë Rama për pensionistët nuk është as sa një kafe në ditë, sepse paratë ajo i shpërdoron dhe i vjedh për inceneratorët dhe koncensionet, ndërsa për pensionistët në Shqipëri jetesa është e papërballueshme”, shkruan Ilir Meta.
