Juventus ka pësuar një tjetër humbje dërrmuese mbrëmjen e sotme. Bardhezinjtë janë mundur 2-0 në javën e katërt të Champions League kundër Maccabi Haifa-t dhe tani është me një këmbë jashtë kompeticionit europian.
Heroi për izraelitët ka qenë Atzili, autor i të dy golave të shënuar nga vendasit në minutën e 7-të dhe të 42-të të pjesës së parë.
Një sezon për t’u harruar deri tani për Juventus-in që ka pësuar gol në gjashtë ndeshje radhazi për herë të parë që nga dhjetori i 2013-ës.
Bardhezinjtë mbajnë vendin e tretë në Grupin H me 3 pikë, katër më pak se Benfica dhe PSG që do të ndeshen në orën 21 në Paris.
Lajmi tjetër i keq për Massimialino Allegri-n ka qenë dëmtimi i pësuar nga Angel di Maria në pjesën e parë. Një dëmtim ky që shqetëson edhe kombëtaren e Argjentinës në prag të Botërorit.
Rezultat zhgënjyes edhe për Manchester City-n, me Qytetarët që kanë barazuar 0-0 në fushën e Copenhagen. Skuadra e Pep ka pasur një mundësi të artë për të kaluar në avantazh në minutën e 25-të, por Mahrez ka gabuar një penallti.
Manchester City ka humbur 24 penallti në të gjitha kompetcionet nën drejtimin e Pep Guardiola, nëntë më shumë se çdo skuadër tjetër e Premier League që nga momenti që spanjolli ka marrë drejtimin e ekipit (sezoni 2016/17).
Situata është përkeqësuar për Citizens me kartonin e kuq të marrë nga Gomez në minutën e 30-të. Vlen të përmendet se Guardiola ka vendosur të mos e aktivizojë Erling Haaland për ndeshjen e sotme.
