Kreu i Partisë Demokratike, Sali Berisha ka shprehur mbështetje të hapur ndaj protestës së pedagogëve për të cilën tha se është plotësisht legjitime dhe kërkoi që në mënyrë urgjente qeveria të reagojë dhe të rritë pagat duke i bërë në të njëjtin nivel si të Kosovë.
Berisha tha se kanë nisur një proces proteste të fuqishme për shkak të keqtrajtimit, nënçmimit që i bëhet atyre me qëllimin e vetëm, shkatërrimin e arsimit të lartë në Shqipëri. Nga foltorja e Kuvendit, Berisha kërkoi 10-fishim të fondeve të buxhetit për kërkim shkencor.
Ish-kryeministri theksoi më tej se dënon me forcë përpjekjen e Edi Ramës për të ndërsyer studentët kundër pedagogëve të tyre dhe për t’u tallur me botën akademike universitare shqiptare.
“Unë nga kjo platformë sot dua të shpreh mbështetjen time të plotë për studentët dhe punonjësit e universiteteve që kanë nisur protestë të fuqishme për shkak të keqtrajtimit që u bëhet atyre me qëllimin e vetëm shkatërrimin e arsimit të lartë në Shqipëri. Dënon me forcë të madhe përpjekjen e Edi Ramës për të ndërsyes studentët kundër pedagogëve të tyre., për t’u tallur me botën akademike universitare shqiptare.
Dënoj qëndrimin që mban ndaj kërkimit shkencore, asfiksinë që i ka krijuar kësaj fushe jetike. Dënon mungesën e ndjeshmërisë ndaj studentëve dhe kërkoj plotësimin me urgjencë të kërkesave të tyre. Çdo student në Shqipëri duhet të subvencionohet me 100 euro. Çdo pedagogu në Shqipëri duhet t’i rritet rroga të paktën sa është në Kosovë. Pse Kosova qenka më e pasur se ne?
Nuk po them Maqedoni por Kosovë, Kërkoj që punonjësit të jenë të universitetit. Të ken trajtimin identik me punonjësit e tjerë në Kosovë. Kërkon 10-fishim të fondeve të buxhetit për shkence. Dikush mund të çuditet. Është 10 herë më i vogël se në Kosovë. E ka fshirë tërësisht kërkimin shkencor nga axhenda”, u shpreh Berisha.
Pedagogët kanë kërkuar nga qeveria që të rrisë pagat dhe të plotësojë kërkesat e tjera pasi në të kundërt kanë paralajmëruar se më 17 tetor nuk do të nisë viti i ri akademik. Gjatë protestës së djeshme në kohë paralele Edi Rama zhvilloi një “anti-miting” në Universitetin Buqësor të Tiranës ku premtoi rritje page 7% për këtë kategori, por i menjëhershëm ishte reagimi i pedagogëve të cilët e kanë refuzuar propozimin e kryeministrit.
Kryetari i Sindikatës së pedagogëve, Aleksandër Kovaçi i është përgjigjur deklaratës së kryeministrit Rama për rritje 7% të rrogës. Gjatë protestës, Kovaçi tha se kjo shifër nuk është rritje rroge, duke theksuar se pagat e universitetit nuk kanë pasur as indeksim.
Pedagogët kanë theksuar se nëse nuk do të ketë një reagim, atëherë do të bojkotojnë procesin mësimor. Kësaj thirrje i janë bashkuar edhe pedagogë të universiteteve të rretheve, duke iu përgjigjur në këtë mënyrë edhe ftesës së Sindikatës së Pedagogëve.
Kërkesat e pedagogëve
-Rritja e pagave për pedagogët dhe stafin ndihmës.
-Rritja e financimit për kërkimin shkencor.
-Rivendosja e shtesave mbi pagë për ‘Dëshmi shëndeti në punë’.
-Rritja e shtesës mbi pagën për vjetërsinë në punë.
-Rritja e pagesës së orëve të ngarkesës suplementare.
-Rivlerësimi i orës mësimore pas ka zbritje prej 50% të pagesës së orës mësimore si rezultat i mosfierencimit të orës mësimore të leksionit.
-Rishikimin e tatimit prej 23% mbi pagesën e ngarkesës suplementare.
-Të pezullohet deri më 2026 zbatimi i pikës c) të paragrafit të 3, i Kreut III të VKM Nr.112, datë 23.2.2018 për kriteret e marrjes së titullit “Profesor”.
-Të bëhet transparencë mbi buxhetin dhe të ardhurat e universitetet publike
