Në të njëjtën ditë dhe orë kur pedagogët kanë dalë në protestë te sheshi para Universitetit Politeknik për të kërkuar rritje pagash dhe financime më të larta për kërkimin shkencore, kryeministri Edi Rama dhe ministrja e Arsimit, Evis Kushi kanë zgjedhur t’i sfidojë me një antimiting nga Universiteti Bujqësor i Tiranës.
Teksa kreu i Sindikatës Aleksandër Kovaçi ishte duke shprehur qëndrimin e tij nga podium duke thënë se “rritja 50% për dy vite, është e panegociueshme”, Rama iu përgjigj në distancë duke bërë me dije se qeveria do të bëjë “një rritje pagash prej 7%”.
“S’mund të ketë për botën akademike një pagë opshe, se nuk janë të gjithë njësoj. Universiteti është autonom”, ishte përgjigja e Ramës për protestën e pedagogëve, ndërkohë që këta të fundit e sfidojnë duke thënë se do të fusin në kolaps sistemin universitar, duke bojkotuar auditorët për vitin akademik 2022-2023.
“Me lëmoshë nuk gënjehemi. Meqë ministrja ka shkuar në UBT për të shprehur mendimet e saj, megjithatë e mirëpresim nëse ka ofertë, por nuk besoj se pa kryeministrin do të ketë”, ishte ndërkohë kundërpërgjigja e Kovaçit.
Ndërkohë, nga UBT-ja, Rama u kujdes që të mos e ashpërsonte më tepër seç duhet gjuhën duke u përpjekur të argumentojë qëndrimin e tij kundër protestës.
“Atyre që dalin në rrugë dhe që kërkojnë rritje pagash opshe, në emër të gjithë pedagogëve iu them se nuk jeni mësues. As mësues gjimnazi, as mësues 9-vjeçare, Nuk jeni as mjek, as infermierë. S’jeni as punonjës policie, as ushtarakë, as nënpunës civilë dhe as pensionistës jo e jo. Të gjithë këta marrin një pagë dhe një pension fiks, ndërkohë që pedagogët janë në një hapësirë të ndërmjetme përmes mbështetjes shtetërore dhe horizontit ku mjafton të duash ja bën vetes pagën edhe 2-fish, edhe 3-fish edhe 5-fish. Janë fondet e universiteteve të tjera private dhe ato të BE-së. Kemi paga që nuk përkojnë me të vërtetën. Por po them se sa shumë potencial ka universiteti. Përpara se të futeshim në procesin e ndërkombëtarizimit dhe përpara se lidershipi i UT të ndryshonte, kemi pasur 45 pedagogë që kishin akses në fondet europiane. Sot janë mbi 400 që kanë financim ekstra falë meritës së tyre, falë angazhimit brenda përbrenda strukturës”, shtoi kreu i qeverisë.
