Nga Boldnews.al
Për të kuptuar se pse nisma e qeverisë dhe e Rilindjes në përgjithësi kundër informalitetit në ndërtime është thjesht në show i radhës propagandistik, mjafton të shohësh se çfarë ndodh pasi zbulohen katet pa leje të “oligarkëve” të ndërtimit.
Pak ditë më parë, Ministri i Brendshëm, Bledi Çuçi, u shfaq në lagjen e tij, duke deklaruar se kishte zbuluar një pallat me kate pa leje. Sipas Çuçit, në një godinë në rrugën “Myslym Shyri”, shumë pranë qendrës së Tiranës, ishin konstatuar rreth 2700 metra katrorë pa leje.
Çuçi nuk e tha se kush e kishte ndërtuar pallatin me kate pa leje. Media zbuloi se kompania ndërtuese ishte ‘Arb-Trans”, në pronësi në administratorit socialist të Zall-Herrit, Arben Maloku dhe familjarëve të tij. Rasti përbën një skandal më vete të Inspektoratit Ndërtimor të Tiranës, i cili “nuk ka parë” katet pa leje të ndërtuara nga kompania e Arben Malokut.
Përgjegjësia kryesore për këtë “verbëri institucionale” rëndon mbi kryeinspektorin ndërtimor, Mariglen Qato. Në raste normale, më së paku ai duhet të mbante përgjegjësi disiplinore nga shefi i tij, Erion Veliaj, por më tej edhe përgjegjësi penale për “Shpërdorim detyre”. Por, siç ndodh rëndom me zyrtarët e Rilindjes, asgjë nuk ndodh. Pra, as me Mariglen Qaton dhe vartësit e tij që nuk panë katet pa leje të Arben Malokut, nuk u mor asnjë masë.
Jo vetëm kaq. Por, kompania “Arb-Trans” përfitoi akoma më shumë, duke u “shpërblyer” me 200 milionë lekë të vjetra, në një tender të zhvilluar nga Bashkia e Tiranës, ku, për më tepër, nuk kishte as ofertën më të ulët. Në Buletin e Prokurimeve Publike të datës 6 Tetor 2022, Bashkia e drejtuar nga Erion Veliaj ka shpallur rezultatet e procedurës tenderuese me objekt “Për shembjen e njësive të banimit në ndërtesa (pallat) të pabanueshme, të dëmtuara nga tërmeti i datës 26.11.2019 dhe transportimin e materialeve të dala nga shembja e tyre në Bashkinë Tiranë”- për 6 (gjashtë) pallate”.
Fondi limit i vendosur në dispozicion për këtë tender ishte 235 milionë lekë të vjetra.
Në garë marrin pjesë dy operatorë ekonomikë. “Arb-Trans” e Arben Malokut shpallet fitues, ndërkohë që konkurrenti tjetër, i cili kishte ofruar vlerë më të ulët për shërbimin, u skualifikua. Kompanitë e ndërtimit dhe pronarët e tyre, të përfshira në punime pa leje, si rregull, mbajnë përgjegjësi penale dhe përballen me ligjin.
Por, në rastin e “zyrtarëve-ndërtues”, ata shpërblehen me qindra milionë lekë pikërisht nga Bashkia e Tiranës, institucioni që kishte për detyrë të verifikonte zbatimin e lejes së ndërtimit dhe penalizimin e subjekteve private kur shkelin ligjin.
