Banorët e pesë pallateve të dëmtuara nga tërmeti në Durrës kanë dalë sot në protestë. Banorët e lagjes nr.5 kundërshtojnë zhvendosjen në periferi pasi theksojnë se duan të jenë aty edhe ku kanë pasur banesat.
Të paktën pesë përfaqësues pallateve janë bërë bashkë para bashkisë dhe kundërshtojnë këtë vendim.
“Ne duam të prishen, po të rindërtohen po aty ku i kemi. Do të ngremë çadrat këtu ku jemi, s’kemi zgjidhje tjetër. U bëjmë thirrje të marrin vendimet e duhura për lagjen numër 5 dhe sa më shpejt sepse nuk po përballojmë dot qiratë”, ka thënë një banore.
Ndërkohë një tjetër banore e zonës thotë se deputeti i zonës që është edhe kryeministri i vendit duhet të zbatojë vendimet e duhura për lagjen ku ata jetojnë.
“Unë jam banore e lagjes numër 5. Të gjithë ne që jemi të dëmtuar nga tërmeti do kalojmë në zonë e re. Ne duam të prishet dhe të rindërtohet aty ku e kemi. Duam të rishikohet bonusi i qirasë. Duke filluar nga sot do të ngremë çadrat këtu ku jemi. Nga këtu do shkojmë te kryeministri. Dua t’i bëj thirrje kryetarit të bashkisë dhe deputetit të zonës njëkohësisht që e kemi edhe kryeministër që të marrë vendimet e duhura për lagjen numër 5. Nuk kërkojmë asgjë. Ne nuk përballojmë dot qiratë. Ne jemi në pritje deri këtu”, thotë ajo.
