Kryetari i bashkisë së Mallakastrës, Qerim Ismailaj pas hetimeve nga SPAK është dorëzuar si i pandehur në Gjykatën e Posaçme për Krimet dhe Korrupsionin, pasi akuzohet se ka mashtruar me formularin e vete deklarimit që ka paraqitur në KQZ.
Akuza e SPAK është ngritur për falsifikim të formularëve të dekriminalizimit, ndërsa GJKKO e pranoi kërkesën për gjykim të shkurtuar nga mbrojtësit ligjor të Ismailajt.
Në seancën e rradhës, e cila do mbahet më 19 tetor, pritet që prokuroria të lexojë konkluzionet përfundimtare.
Por si përfundoi ish-mësuesi që u bë kryetar bashkie në SPAK?
Partia Demokratike ishte ajo që më 8 janar të 2020 paraqiti fakte se Ismailaj kishte qenë i dënuar në Greqi me burg dhe e kishte fshehur precedentin e tij penal në formularin e vetëdeklarimit.
PD kërkoi nga Prokuroria që t’i paraqiste KQZ-së provat ligjore që e shndërronin kryebashkiakun e Mallakastrës në subjekt ndalimi sipas ligjit të dekriminalizimit.
“Sipas vërtetimit me nr. Protokolli 405 të Prokurorisë pranë Gjykatës së Shkallës së Parë Athinë, Qerim Ismailaj, rezulton i dënuar me 3 vjet burgim nga Gjykata e Kios, më datë 25 Shkurt 2000. Ai është dënuar për kryerjen e veprimeve të dhunshme, plagosje (rrahje) dhe nuk e ka vuajtur dënimin për shkak të mos gjetjes në territorin grek”, thuhej asokohe në deklaratën e PD.
Ndërkohë, prokuroria i ktheu përgjigje KQZ-së duke deklaruar se kryetari aktual i Bashkisë Mallakastër, Qerim Ismailaj, rezulton i dënuar në Greqi me vendim të formës së prerë të vitit 2000 për një ngjarje të ndodhur në 1999.
KQZ dhe KAS më pas vlerësuan se Ismailaj nuk ishte në kushtet e ndalimit të ushtrimit të detyrës, ndërsa vetë kryebashkiaku pretendon se nuk ka qenë në dijeni të faktit se është dënuar në Greqi.
Ai është mbrojtur duke thënë se në periudhën kur pretendohet se ka dalë ky vendim ka qenë duke punuar si mësues.
Gjithashtu në formularin e dekriminalizimit Qerim Ismailaj shkruan se ka jetuar në Mitilini të Greqisë gjatë periudhës 1998-1999, periudhë pas së cilës është kthyer në atdhe ku nënvizon se ka nisur punë si mësues në shkollën 8-vjeçare në Çorrush të Mallakastrës. Më vonë ka punuar si sekretar i Këshillit të Qarkut në Fier, ndërsa ka ushtruar edhe detyrën e kryetarit të Komunës Kutë.
