Ashtu siç ishte paralajmëruar më herët, pedagogët e Universitetit të Tiranës ditën e sotme po protestojnë duke i kërkuar qeverisë që të rritë pagat dhe plotësojë disa kushtet të vendosura prej tyre.
Nën sloganin “Ora e mësimit e shenjtë, përse paguhet 5 euro?!”, pedagogët kanë paralajmëruar bojkot të plotë të orëve mësimore nëse qeveria nuk plotëson kushtet.
Kreu i Sindikatës së pedagogëve, Aleksandër Kovaçi i ka bërë thirrje kryeministrit Edi Rama që të reflektojë dhe të rrisë pagat. Mes të tjerash ai pohoi se nuk presin “karamele apo lëmosha”.
“E mirëpresim kryeministrin për Rektoratin, por jo lëmoshë apo karamele. Me lëmoshë nuk gënjehemi. bëhet fjalë për qëndrim esencial ndaj arsimit të lartë publik. Që ti përgjigjet ekonomisë së vendit dhe kërkimit shkencor. Pa kërkim shkencor nuk ka zhvillim. Rritja 50% për dy vite, është e panegociueshme. Dhe për vitet e ardhshme dy here. Nëse behet kjo rritje, nuk shkojmë as sa Kosova, 1200 euro”, tha Kovaçi.
Kërkesat e pedagogëve:
-Rritja e pagave për pedagogët dhe stafin ndihmës (nuk është plotësuar)
-Rritja e financimit për kërkimin shkencor (nuk është plotësuar)
-Rivendosja e shtesave mbi pagë për ‘Dëshmëri shëndeti në punë’ (nuk është plotësuar)
-Rritja e shtesës mbi pagën për vjetërsinë në punë (nuk është plotësuar)
-Rritja e pagesës së orëve të ngarkesës suplementare (do shqyrtohet)
-Rivlerësimi i orës mësimore pasi ka zbritje prej 50% të pagesës së orës mësimore si rezultat i mosfierencimit të orës mësimore të leksionit. (do shqyrtohet)
-Rishikimin e tatimit prej 23% mbi pagesën e ngarkesës suplementare (do shqyrtohet)
-Të pezullohet deri më 2026 zbatimi i pikës c) të paragrafit të 3, i Kreut III të VKM Nr.112, datë 23.2.2018 për kriteret e marrjes së titullit “Profesor”. (do shqyrtohet)
-Të bëhet transparencë mbi buxhetin dhe të ardhurat e universitetet publike. (është rënë dakord)
Kujtojmë që në mbështetje të pedagogëve ka dalë opozita me kryetarin e PD-së Sali Berishën i cili mëngjesin e sotëm i bëri thirrje qytetarëve që të dalin në shesh dhe të mbrojnë kauzën e arsimtarëve në Shqipëri të cilët marrin pagën më të ulët nga të gjitha vendet e rajonit. Gjithashtu edhe kreu i Partisë së Lirisë ka shprehur hapur mbështetjen ndaj Pedagogëve të cilët prej vitesh janë lënë në harresë nga qeveria Rama.
