Pedagogët kanë paralajmëruar mbajtjen e një proteste ditën e nesërme në orën 11:00, në sheshin Nënë Tereza.
Pedagogët kanë parashtruar një sërë kërkesash për qeverinë, duke nisur që nga rritje rrogash, e deri në rishikimin e vlerës së tatimit për pagat e tyre.
Kërkesat e pedagogëve:
-Rritja e pagave për pedagogët dhe stafin ndihmës.
-Rritja e financimit për kërkimin shkencor.
-Rivendosja e shtesave mbi pagë për ‘Dëshmëri shëndeti në punë’.
-Rritja e shtesës mbi pagën për vjetërsinë në punë.
-Rritja e pagesës së orëve të ngarkesës suplementare.
-Rivlerësimi i orës mësimore pasi ka zbritje prej 50% të pagesës së orës mësimore si rezultat i mosfierencimit të orës mësimore të leksionit.
-Rishikimin e tatimit prej 23% mbi pagesën e ngarkesës suplementare .
-Të pezullohet deri më 2026 zbatimi i pikës c) të paragrafit të 3, i Kreut III të VKM Nr.112, datë 23.2.2018 për kriteret e marrjes së titullit “Profesor”.
-Të bëhet transparencë mbi buxhetin dhe të ardhurat e universitetet publike.
Sindikata e Punonjësve të Universiteteve të Shqipërisë ka publikuar thirrjen për mbështetjen e protestës së pedagogëve në orën 11:00 të datës 5 tetor.
Thirrja e plotë:
Të dashur kolegë të IAL-ve publike!
Të dashur Profesorë të IAL-ve publike!
Të dashur pedagogë të rinj të IAL-ve publike!
Të dashur punonjës ndihmës akademikë dhe administrativ të IAL-ve publike!
Le të bëhemi këtë herë të gjithë bashkë në emër të misionit tonë akademik. Të gjithë profesorët që dëshirojnë që studentët nesër të vazhdojnë misionin e tyre, sot duhet të bëhen bashkë për ta bërë këtë profesion misionar të mirëpaguar.
Në datën 5 Tetor, ora 11:00, le të bëhemi të gjithë bashkë për të demonstruar se misioni ynë i përbashkët akademik nuk mbetet vetëm brenda mureve të auditoreve. Do na duhet të jemi të gjithë bashkë, jo thjesht për kërkesa ekonomike, por për një vlerësim dinjitoz të punës sonë. Nuk po kërkojmë thjesht rritje të pagave, pasi vlera e punës tonë do të jetë gjithmonë më shumë se çdo vlerë monetare.
Misioni ynë akademik nuk ka njësi matëse!
Ju bëjmë me dije se do të qëndrojmë fort për të konkretizuar kërkesat tona legjitime në vlerësim të dinjitetit profesional, që ka për qëllim t’i shërbejë vetëm të mirës publike, larg interesit të politikës së ditës.
Ftojmë kolegët e universiteteve në mbarë Shqipërinë të mbështesin Protestën e Datës
5 Tetor 2022, ora 11.00, para godinës së Universitetit Politeknik të Tiranës.
Le ta bëjmë këtë godinë Simbolin e Qëndresës Akademike!
Të nderuar drejtues të IAL-ve publike!
Lutemi të qëndroni në lartësinë e detyrës/funksionit tuaj akademik, duke mos penguar apo intimiduar pjesëmarrjen në këtë protestë të stafit.
Note: Në vëmendjen tonë është mbrojtja e të drejtave të çdo pjesëmarrësi në protestë. Në anën tonë kemi vetëm të drejtën dhe ligjin. Sipas nenin 197, pika 4, të Kodit të Punës “Ndalohet çdo veprim që përfshin shtrëngim, cënim ose diskriminim ndaj punëmarrësve për shkak të pjesëmarrjes apo jo në grevë”.
