Kryetari i Partisë së Lirisë, Ilir Meta, thotë se plani i kryeministrit Rama është të shkatërrojë shtresën e mesme duke e detyruar të largohet jashtë vendit.
Sipas tij, shtresa e mesme është ajo që siguron dhe garanton demokracinë dhe ndaj ajo rezulton të jetë më e goditura nga qeveria Rama. Meta thotë se Rama fuqizon grupet kriminale, pastron paratë e tyre dhe më pas godet biznesin e ndershëm dhe të gjithë këta të detyrohen nga konkurrenca e pandershme t’i shesin për një copë bukë e në fund largohet nga Shqipëria.
“Kur ngrihet populli bien çmimet. Nuk ekziston asnjë krizë përveç atyre që shpiken nga mendja e Edi Ramës dhe e gjithë segmenteve të tij. Ka qenë një koherencë e qartë e Partisë së Lirisë se vjedhja që planifikonte të bënte Edi Rama përmes 4-fishimit të çmimit të energjisë ishte një përpjekje për të mbuluar dështimet 8-vjeçare në sektorin e energjisë.
Politika e Edi Ramës është shumë e qartë, të fuqizohen grupet kriminale, të pastrohen paratë e tyre, të goditet shtresa e mesme dhe biznesi i ndershëm dhe të gjithë këta të detyrohen nga konkurrenca e pandershme t’i shesin për një copë bukë dhe të ikin nga vendi.
Kjo eshtë politika e Edi Ramës, shkatërrimi i shtresës së mesme si garant i demokracisë”, tha Meta.
