Kryetari i Partisë Demokratike, Sali Berisha, gjatë një takimi me qytetarët në Gramsh, tha se qyteti i Gramshit është lënë pas dore nga qeveria e Ramës, ndërsa shtoi se investimi i vetëm është Kaskada e Devollit e cila u bë nga qeveria e drejtuar nga vetë kryedemokrati.
“Sot qytetarët e Gramshit dhe mbarë Shqipërisë, deri diku pavarësisht nga bindjet partiake, ndjekin me dhimbje dhe keqardhje, shkretimin e shoqërisë, vendit, kombit të tyre, në kuptimin e shpopullimit të shpejtë dhe marramendës. Në kuptimin e një varfërie që nuk pakësohet, por vjen duke u rritur. Në kuptimin e zhvillimit të disa dukurive të cilat u kushtojnë jetë njerëzve, masivizimi i drogës, nxjerrjen e emrit tonë si shqiptar dhe përfaqësimin tonë për fat të keq në botë, më shumë se me çdo gjë tjetër me emra organizatash kriminale. Sot shqiptarët janë të paktën 30 % më të varfër se në vitin 2013 dhe ua them me vërtetësinë më të madhe, sot ata duhej të ishin minimumi 2 herë më të mëkëmbur se në vitin 2013. Koha matet me zhvillimet që ndodhin gjatë saj. Po të pyesim sëbashku veten, çfarë zhvillimesh kanë ndodhur këto 8 vite në Gramsh, përveç projektit të madh të Devollit, që nuk është i këtyre viteve. Siç e dini ju është i qeverisë së mëparshme dhe herën e fundit që kam qenë në këtë rreth kam qenë në inaugurimin e Kaskadës së Devollit dhe disa orë pas meje, erdhi Edi Rama dhe deklaroi se kjo është gënjeshtra e radhës e Sali Berishës. Në të vërtetë sot ajo është një realitet i çmuar, i fuqishëm, pavarësisht se sot përsëri fshatrat e Gramshit buzë liqenit nuk kanë mundësi të vadisin tokat e tyre. Gjithë kjo vepër e madhe që është ndërtuar, në drejtim të fshatrave, zonave turistike nuk është ndërtuar asgjë”, tha Berisha.
Ai shtoi se projektet e qeverisë së PD për Gramshin, u braktisën nga Rama.
“Gramshi është një rreth me potenciale të mëdha, qoftë turistike, por ka edhe potenciale të mëdha në frutikulturë. Gramshi është zonë në të cilën rriten drurë frutore më të kërkuara dhe më të çmuara. Është një nga epiqendrat më kryesore të arrorëve dhe fikut. Por ato projekte mbetën aty ky ishin, dhe nuk u stimuluan më, në mënyrë që fermerët e Gramshit të begatonin, prosperonin. Gramshi ka lumenj, liqene e gjithë ato bukuri turistike. Njëra prej tyre është ujëvara e Sotirës dhe Sotira si fshat e shpallur në 100 fshatrat për tu investuar, por 1 km rrugë nuk është shtruar nga Edi Rama. Isha në Pukë para 1 jave. Edhe atje, Qelzën e kishin shpallur fshat turistik, por njëlloj si në Sotirë, përveç emrit dhe shpalljes, asnjë lloj investimi. Në këtë aspekt Gramshi është një zonë e harruar dhe injoruar nga kjo qeveri, e cila mban ndaj qytetarëve shqiptarë, një qëndrim shpërfillës, ç’njerëzor dhe ndaj fermerëve shqiptarë një qëndrim armiqësor”, shtoi ai.
