Deputeti demokrat Ervin Salianji, ka denoncuar nga sheshi “Skënderbej”, këtë të martë një prej gradaçelave që është ndërtuar muajt e fundit në qendër të Tiranës. Bëhet fjalë për pallatin 40 katësh, objektin e quajtur “Eyes of Tirana”.
Salianji akuzoi qeverinë se ka mbyllur gojën ndaj ndërtimit pa leje që po bëhet në mes të Tiranës, përballë zyrave të vetë Partisë Socialiste.
“Me datë 13 shtator 2022 i jam drejtuar qeverisë për informacion se sa është numri i subjekteve të paligjshme që kanë shkelur lejen e ndërtimit, numri i rasteve të ndërtimeve të paligjshme dhe a janë marrë administrative apo a janë kallëzuar penalisht zyrtarë?Sot pas më shumë se 2 javësh, qeveria ende nuk e ka një përgjigje sepse është tërësisht e kapur dhe e pafuqishme dhe ligji nuk është i barabartë për të gjithë. Qindra qytetarë janë arrestuar për ndërtime në shtëpitë e tyre. Qeveria ndjek penalisht çdo qytetar të pamundur në këtë vend, nga ana tjetër këtu shikojeni pak përballë institucioneve më të rëndësishme, ku kalojnë ministra, drejtuesit e Policisë së Shtetit, kjo është leja e miratuar nga Rama, KKT 26 kate”, ka thënë Salianji.
Madje, deputeti tha se kryeministri Edi Rama ka firmosur projektin me 26 kate, por “çuditërisht” gradaçela ka shkuar në 40 kate.
“Ky ndërtim, shikoni sa ka shkuar. A ka mundësi që ky ndërtim në mes të Tiranës, një grataçelë të bëhet pa bekimin e qeverisë?Sot po e pyes zyrtarisht a e ka çuar dhe referuar në prokurori IKMT dhe Policia e Shtetit? Do të jem bashkë me ju në ndërtesa të tjera në Tiranë, në përbindësha betoni që kanë marrë dhe shtetin në kontroll duke ndërtuar në mënyrë të paligjshme.
Sot ndërtime si ky duhet të kishin miliona euro gjobë. Nga ana tjetër ndërtuesi apo pronari i këtij duhet të ishte para përgjegjësisë penale. Qeveria e ka mbyllur gojën sepse nuk ka asnjë përgjigje. Do vazhdojmë të denoncojmë në vende të tjera se ku qeveria favorizon duke vendosur dyfytyrësinë dhe jo barazinë para ligji”, ka përfunduar deputeti.
