Me një vendim të Këshillit të Ministrave qeveria i dha fund eksperiencës 26 vjeçare në arsimimin e nxënësve shqiptarë nga ana e kolegjit turk “Mehmet Akif Ersoy” në Tiranë, duke urdhëruar mbylljen e këtij incitucioni.
Vendimi i paprecedentë erdhi çuditërisht 10 ditë pas nisjes së vitit të ri shkollor 2022-2023, ndërsa ministrja e Arsimit, Evis Kushi nisur nga reagimet e ashpra të opinioinit public kundër këtij vendimi të qeverisë, u detyrua sot që të mbrohet me justifikime qesharake.
Sipas ministres së Ramës shkolla jopublike ka kryer disa shkelje të ligjeve, pasi ka nisur procesin mësimor në vendndodhje të re dhe mjedise të pamiratuara nga MAS, të cilat nuk i kanë përmbushur kriteret edhe pas dy verifikimesh.
Por, drejtuesit e kolegjit në një dalje për mediat kanë hedhur poshtë argumentat e ministres Kushi, duke sqaruar se ka qenë “Ministria e Arsimit që miratoi ndryshimin e vendndodhjes”.
“Duhet theksuar se gjatë gjithë këtyre viteve, kopështi ka qenë objekt i inspektimeve të vazhdueshme. E vërteta është se ndodhemi përpara një fakti të tillë të vështirë për ta kuptuar. Rrethanat na bëjnë të kuptojmë se jemi sjellë në një situatë të tillë si pasojë e rrethanave jo arsimore. Ne kërkojmë nga ministria e Arsimit të rishikojë vendimin pasi ka përballë persona që e dashurojnë arsimin. Ky vendim prish qetësinë e mbi 200 familjeve që i kanë besuar këtij institucioni arsimin e fëmijëve të tyre”, tha një nga drejtuesit e kolegjit.
Ndërkohë, ata lënë të kuptohet se vendimi surprizë i qeverisë shqiptare është i ndikuar nga faktorë të jashtëm.
“Vlerat dhe trysnia e jashtme nuk kanë të bëjnë me kushtet në të cilët zhvillohet arsimi. Kemi informuar edhe institucionet e huaja për situatën e krijuar. Shprehim gatishmërinë tonë për të ndjekur rrugën ligjore në gjykatën përkatëse. Sjellim në vëmendjen tuaj se stafi pedagogjik janë të vendosur për t’u trashëguar brezave një të ardhme ku mbizotëron dashuria për atdheun”, thanë përfaqësuesit në konferencën për shtyp.
Ky qëndrim vjen në një kohë kur raporti i kryeministrit Edi Rama me Presidentin turk Rexhep Taip Erdogan mbetet tepër miqësor dhe nga Ankaraja është pretenduar se shkollat turke në Shqipëri financohen nga Lëvizja Gyleniste dhe ndaj në mënyrë të vazhdueshme është kërkuar mbyllja e tyre.
