Katër zyrtarë të UBT janë arrestuar pasi akuzohen se kanë përvetësuar plehra kimike dhe kanë falsifikuar dokumentacionin për hyrjen dhe daljen fiktive të këtyre imputeve bujqësore në magazinat e Fermës Didaktike të Universitetit Bujqësor Kamëz.
Të arrestuarit janë:
1- Ali Isuf Rasha, me detyre Drejtor i Fermes Didaktike Eksperimentale ne Universitetin Bujqesor Tirane.
2- Tahir Aqif Ballgjini, me detyre Pergjegjes i Sektorit te Bujqesise.
3- Rushit Imer Suna, me detyre specialist i sektorit te bujqesise.
4- Ahmet Koçi Mejdani, me detyre magazinier ne magazinen qendrore ne Universitetin Bujqesor Tirane.
Sipas prokurorisë, me veprimet e tyre aktive këta persona dyshohet se i kanë sjellë dëm interesave të shtetit, duke përvetësuar plehrat kimike në vlera të konsiderueshme dhe duke falsifikuar dokumentacionin për hyrjen dhe daljen fiktive të këtyre imputeve bujqësore dhe plehrave kimike në magazinat e Fermës Didaktike të Universitetit Bujqësor Kamëz.
Ata akuzohen për veprat penale “vjedhja” duke “shpërdorur detyrën” dhe “falsifikim kompjuterik”. Ndaj të katërve, gjykata e Tiranës ka vendosur arrest me burg kërkuar nga prokuroria. Masa që janë ekzekutuar nga policia këtë të premte.
Hetimet pas dëshmisë së magazinierit
Prokuroria e Tiranës bën me dije se ka regjistruar procesimin penal në më datë 10.09.2022 pas kallëzimit të A.Ç., magazinier në UBT.
Referuar të njëjtave burime: ai ka deklaruar se është i punësuar prej rreth 10 vitesh si magazinier në Universitetin Bujqësor Kamëz.
Aktualisht drejtori i tij është Ali Rasha
Më datë 29.12.2021 i është komunikuar nga drejtori, për tu paraqitur në magazinë për të tërhequr dokumentacionin e datës 23.12.2021 mbi plehrat kimike dhe imputet bujqësore. Dokumentacioni kishte lidhje me një tenderim nga ana e subjektit Gjelbërimi sh.p.k. me pronar shtetasin F.Sh.
Sipas kallëzuesit, marrja në dorëzim e mallit sipas prokurorimit ishte bërë nga komisioni i përbërë nga shtetasit Tahir Ballgjini, H.V. dhe K.P.
Kallëzuesi ka pretenduar nga drejtori i ij, se mallrat nuk janë në gjendje sipas procesverbaleve dhe ka marrë si përgjigje se malli do të jetë i pranishëm në magazinë shumë shpejt dhe se kallëzuesi duhet të firmoste daljen e mallit në mirëbesim dhe se kishte garancinë nga drejtori se ky mall do të ishte pjesë e inventarit të magazines shumë shpejt.
Sipas fletëhyrjes në magazinë, vlera e mallit ishte 10.5 milionë. Kallëzuesi në mirëbesim ka nënshkruar fletëhyrjen dhe ka deklaruar se malli per shumën 3.7 milionë lekë nuk është bërë asnjëherë hyrje në magazinë dhe nga kjo shumë, kallëzuesi, po në mirëbesim, ka nënshkruar një fletëdalje për shumën e mallit 1.958.500 lekë. Dalja për këtë vlerë malli, sipas kallëzuesit është bërë nën trysninë e vazhdueshme të shtetasit Ali Rasha.
Kallëzuesi nga fundi i muajit Dhjetor të vitit 2021 ka tentuar shumë herë të komunikojë me Ali Rashën dhe persona të tjerë duke përfshirë dhe Rektorin e Universitetit Bujqësor Kamëz, emrin e të cilit sipas kallëzuesit, e ka përdorur shpesh Ali Rasha si mbrojtje për situatën e krijuar dhe për mungesën e mallit në magazinë, për hyrjen dhe daljen fiktive të mallit.
