Komisioni i Ligjeve ka nisur sot diskutimin e dy nismave të deputetëve për deklasifikimin e të gjitha dosjeve të ish-Sigurimit të Shtetit si dhe verifikimit të certifikatave të pastërtisë për personat që kandidojnë në institucionet kushtetuese.
Enkelejd Alibeaj, ka prezantuar në Komisionin e Ligjeve, projektligjin për një shtesë në ligjin nr. 8457, datë 11.02.1999, “Për Informacionin e Klasifikuar “Sekret Shtetëror””, ose siç njihet ndryshe ligji për hapjen e dosjeve.
Në fjalën e tij Alibeaj, kërkoi hapjen e plotë të dosjeve, në mënyrë që qytetarët të njihen me anën më të errët të sistemit komunist që ishte Sigurimi i Shtetit. Gjithashtu ai shtoi se me hapjen e dosjeve përfundon dhe psikoza e shantazhit përmes dosjeve në luftën politike.
“Psikoza e shantazhit përmes dosjeve vijon. Ishte një situatë moralisht e neveritshme e asaj që ka ndodhur në sistemin komunist. Ka vazhduar dhe në këto 31-vitë, psikoza e shantazhit, është përdorur edhe si mjet i luftës politike. Shantazhi psikologjik me dosje është i pranishëm në tryezat politike”, tha ai.
Ai kërkoi nga kolegët që iniciativa të tilla mos të bien në kurthin e lojës politike, por të përdoren si një mjet i domosdoshëm që shoqëria shqiptare ka në raport me të shkuarën dhe historinë.
“Kur kemi marrë këtë iniciativë kemi pasur parasysh rrezikun që iniciativa të tilla mund të bien në kurthin e luftës politike. Kolegë unë ju kërkoj të mos e shihni në këtë mënyrë kjo nuk duhet të shndërrohet në një lojë të vogël politike apo të dialektikës politike. Kjo duhet parë si një mjet i nevojshëm dhe i domosdoshëm që shoqëria shqiptare e gjitha ka në raport me historinë, me të shkuarën dhe mbi të gjitha mbi aktualitetin dhe mbi të ardhmen. Do doja mirëkuptimin tuaj, por dhe nga publiku që duhet parë vetëm në këtë mënyrë. Ne jemi të hapur për diskutime për ta bërë ligjin më perfekt dhe më të aplikueshëm”, tha Alibeaj.
Partia Socialiste ka dhënë dakordësinë për nismën e Alibeajt. Deputetja e PS, Ermonela Felaj tha se ka ardhur momente që të jenë të gjithë bashkë për këtë nismë.
“Ka ardhur koha që të jemi të hapur ndaj të shkuarës duke mos lejuar më atë që zoti Alibeaj tha që mund të jenë përdorur për shantazh. Nuk është në nderin e deputetëve që të fshihen pas klauzolave të tilla. Ka ardhur koha që të jemi të gjithë bashkë për heqjen e paragrafit katër të ligjit.
Ligji për autoritetin e dosjeve i është nënnshtruar vetëm njëherë ndryshimit, do ta shihja të gjykonim qoftë ndryshimit të bërë nga zoti Alibeaj. Autoriteti do ta thotë vetë”, tha Felaj.
