Gazetarja Klodiana Lala është shprehur se janë zbardhur biseda që mund të çojnë drejt zgjidhjes së misterit për fatin e të shumëkërkuarit Ervis Martinaj, i cili që prej 9 gushtit, është zhdukur pa gjurmë. E ftuar në “Opinion”, Lala tha se përgjimet e bisedat janë zbuluar nga dosje të vjetra. Ajo tha se ato dosje janë marrë nën hetim nga prokurorët dhe aty janë gjetur biseda rastësore që kanë lidhje me Martinajn. Por, Lala shtoi se nuk mund të japë më shumë detaje për to.
“Kanë dalë përgjime, ka biseda të zbardhura por, familja këmbëngul në pistën e zhdukjes e të eliminimit, por prokuroria nuk i heq të gjitha dyshimet. Gjithsesi, kryeministrit nuk i takon të dalë dhe të thotë që ne kemi infomacione për të shumëkërkuarin, s’është detyra e tij. Kam disa përgjime, por nuk marr përsipër të flas për to ende. Janë disa përgjime që kanë dalë rastësisht si pasojë e hetimit të disa dosjeve të tjera që janë marrë përsipër prej tyre. Gjithsesi, e vetmja gjë që duhet të sqarojë kryeministri Rama është se a është rastësi që po rikthehen lojërat e fatit? U prenë si me thikë, por po rihapen,”- tha Klodiana Lala.
Ervis Martinaj ishte shpallur në kërkim, në kuadër të operacionit “Plumbi i Artë”, pasi i penduari i drejtësisë Nuredin Dumani, tha se i kishte ofruar një ‘çek të bardhë’ në këmbim të ‘kokës’ së Indrit Dokles. Por, në 9 gusht, ai u zhduk pa gjurmë. Alarmin e ngritën familjarët e Martinajt dhe tashmë prokuroria po heton për rrëmbim personi dhe inskenim. Lidhur me këtë çështje, ka pasur edhe reagime nga kryeministri Edi Rama. Ai paralajmëroi edhe zhvillime, duke u shprehur se Policia e ka një përgjigje, por shumë shpejt do dalë me prova.
