Nga BoldNews.al
Prokurori i Tiranës, Bledar Valikaj, njëkohësisht bashkëshort i deputetes socialiste, Ermonela Felaj, urdhëroi pasditen e së Hënës median që të mos publikojë të dhënat masive të rrjedhura nga Policia e Shtetit, pas atij që konsiderohet si sulmi më i rëndë i hakerimit në historinë e Shqipërisë.
Urdhëri i prokurorit u shpërnda nga Policia e Shtetit dhe gjuha e përdorur në tekst ishte e njëjtë me kërcënimet e herë pas hershme të lëshuara nga kryeministri Edi Rama, sa herë që media ka raportuar për të dhëna konfidenciale shtetërore.
Përtej faktit që “urdhëri” i prokurorit është në tejkalim të rolit të tij dhe ndërhyrje flagrante në funksionet e “pushtetit i katërt”, vendimi i Valikajt për të censuruar informacion konfidencial dhe sekret është gjithashtu i pazbatueshëm, për një arsye shumë të thjeshtë;
Të dhënat e Policisë së Shtetit janë publikuar nga profilin “Homeland Justice” në rrjetin social Telegram.
Pra, edhe në rast se media vendos të mos i publikojë këto të dhëna, sërish personat e interesuar mund të shkarkojnë informacionin nga rrjeti Telegram.
Ka një mënyrë që urdhëri i Valikajt të zbatohet plotësisht-të urdhërohet rrjeti ndërkombëtar Telegram që të fshijë të dhënat e Shtetit Shqiptar.
Por, a e ka kaq forcë Prokuroria Shqiptare sa të urdhërojë rrjetin social? Natyrisht, askush nuk beson se kjo gjë është e mundur. Censurimi i rrjetit Telegram është po aq i pamundur, njëlloj si të urdhërohet bllokimin i të dhënave që publikohen në “Facebook” apo “Twitter”-thjesht e pamundur, në rast se nuk ke mik CEO-t e këtyre rrjeteve sociale.
Kjo është sa i përket aspektit teknik.
Vendimi i prokurorisë, i diktuar dukshëm nga Policia e Shtetit, ka edhe një problem ligjor. Vepra penale “nxjerrja e sekretit hetimor” lidhet kryesisht me funksionarët/zyrtarët, të cilët kanë akses në informacion të klasifikuar dhe që janë të detyruar ligjërisht të ruajnë dhe mbrojnë konfidencialitetin.
Prokurori dhe, bashkë me të edhe Policia, kanë urdhëruar censurimin e një informacioni, të cilin në fakt as nuk e dinë se cili është dhe çfarë kanë në duar “hakerat”.
Kur “Homeland Justice” publikoi informacione konfidenciale të qytetarëve, të njëjta me ato që janë në duar edhe të Patronazhistëve të Partisë Socialiste, asnjë prej institucioneve ligjzbatuese nuk u shqetësua dhe askush nuk urdhëroi, të paktën formalisht, mos-publikimin e tyre.
Për Shtetin, qytetarët janë të dorës së dytë. Më e rëndësishmja është që të mbrohen informacionet shtetërore. Gjithësesi, media nuk është subjekt që trajton dhe përpunon të dhëna sekrete dhe konfidenciale. Kjo është detyrë e institucioneve të posaçme dhe janë ato që kanë detyrë të respektojnë parashikimet e Kodit Penal. Çdo ndalim për median është thjesht censurë.
Urdhëri i prokurorit, i nxitur nga Policia e Shtetit dhe qeveria, zbulon edhe një tjetër qasje jo-korrekte të institucioneve ligjzbatuese.
Deri më tani, nuk ka asnjë informacion publik nëse po hetohet se ku përfunduan dhjetra milionë euro për sigurinë kibernetike, të cilat u zhduken si me magji nga një grup hakerash. Prej vitesh, “Shqipëria dixhitale” ka qenë lajt-motiv i kryeministrit Edi Rama. Kjo Shqipëri e internetit u rrëzua si kështjellë rëre e bashkë me të avulluan edhe milionat e eurove për sisteme e sigurimi kompjuterike.
Para se të urdhërohet censura mediatike, më së pari duhet hetuar se si janë shpërdoruar miliarda lekë për sisteme skarco. Kjo është ajo që duhet të shohi prokurori i çështjes dhe Policia. Sa për informacionin sekret, edhe sikur media të pranonte të vetë-censurohej, informacionet sekret dhe konfidenciale gjenden tek “Homeland Justice”.
“Çunat e Dubait”, “çunat e Lodrës” apo kushdo “çuna” mjafton të hapë “Telegramin” dhe gjen aty çdo gjë, për të cilën Policia dhe Qeveria ishte e detyruar ta ruante si “sytë e ballit”. Tashmë, çdo gjë është para “syve të botës” dhe asgjë nuk mund të ndalohet me njoftime kërcënuese ndaj medias.
