Vetëm një fjalëkalim thuhet se mjaftoi që një grup hakerësh të shkatërronte një kompani britanike 158-vjeçare dhe të linte 700 punonjës pa punë.
Në një artikull të publikuar nga BBC, thuhet se një kompani transporti në Northamptonshire (KNP), është vetëm një nga dhjetëra mijëra biznese në Mbretërinë e Bashkuar që janë goditur nga sulmet kibernetike.
Emra të njohur kompanish si M&S, Co-op dhe Harrods janë sulmuar muajt e fundit. Vetë drejtori i përgjithshëm i Co-op konfirmoi se të dhënat e 6.5 milionë anëtarëve të saj janë vjedhur.
Por në rastin e KNP-së, dyshohet se hakerët arritën të futeshin në sistemin informatik të kompanisë thjesht duke gjetur një fjalëkalim të dobët të një punonjësi, më pas kriptuan të dhënat dhe bllokuan të gjitha sistemet e brendshme.
Drejtori i KNP-së, Paul Abbott, thotë se nuk ia ka treguar punonjësit se fjalëkalimi i tij ndoshta çoi në shkatërrimin e kompanisë. “A do të doje ta dije nëse ishe ti?”, pyet ai.
“Organizatat duhet të marrin masa për të siguruar sistemet e tyre,” thotë Richard Horne, CEO i Qendrës Kombëtare për Siguri Kibernetike (NCSC) në Britani, e cila merret çdo ditë me sulme ransomëare nga banda ndërkombëtare.
Një gabim i vetëm, pasoja katastrofale
Në vitin 2023, KNP operonte me 500 kamionë, shumica nën markën Knights of Old. Kompania deklaron se kishte një sistem IT-je sipas standardeve të industrisë dhe sigurim kundër sulmeve kibernetike.
Por grupi kriminal Akira arriti të futej në sistem. Punonjësit nuk mund të hynin më në të dhënat e nevojshme për funksionimin e përditshëm. Hakerët kërkuan pagesë për të kthyer të dhënat, por nuk dhanë një shumë të caktuar. Një kompani ndërmjetëse e specializuar në negociata vlerësoi se shuma mund të arrinte deri në 5 milionë paund.
KNP nuk kishte mundësi të paguante dhe, përfundimisht, të gjitha të dhënat u humbën dhe kompania falimentoi.
Kështu, mjafton një fjalëkalim i dobët dhe një neglizhencë e vogël për të rrënuar një kompani shekullore. Ekspertët në Britani ngrenë alarmin se vetëm masa të forta sigurie dhe ndërgjegjësim i lartë mund të ndalin këtë valë sulmesh që po dëmton rëndë bizneset dhe qytetarët.
