Policia në Tiranë ka arrestuar një 31-vjeçar që shpërndante lëndë narkotike kokainë në kryeqytet.
Bëhet me dije se në pranga ka rënë 31-vjeçari me iniciale K.M, pasi automjeti i të riut u ndalua në rrugën “Kokonizi” për kontroll dhe aty shërbimet e policisë gjetën 35 doza me lëndë të dyshuar narkotike kokainë, gati për shitje. Gjithashtu policia gjatë kontrollit në banesën e këtij shtetasi ka sekuestruar 3 armë zjarri pistoleta dhe municion luftarak.
“Specialistët e Seksionit për Hetimin e Narkotikëve në DVP Tiranë, në bashkëpunim me Forcën e Posaçme “Shqiponja”, në vijim të punës për goditjen e paligjshmërisë, pas informacioneve të marra në rrugë operative se një shtetas shpërndante kokainë në zona të ndryshme të Tiranës dhe mbante armë zjarri në banesë, kanë organizuar dhe finalizuar operacionin policor të koduar “Doses”.
Si rezultat i këtij operacioni u arrestua në flagrancë shtetasi K. M., 31 vjeç, banues në Tiranë. Shërbimet e Policisë, në rrugën “Kokonizi”, kanë ndaluar automjetin me drejtues shtetasin K. M., në të cilin, gjatë kontrollit, kanë gjetur dhe sekuestruar, në cilësinë e provës materiale, 35 doza me lëndë të dyshuar narkotike kokainë, gati për shitje. Në vijim të veprimeve, gjatë kontrollit të banesës së tij, shërbimet e Policisë, gjetën dhe sekuestruan, në cilësinë e provës materiale, sasi tjetër lënde të dyshuar narkotike kokainë, 3 armë zjarri pistoleta dhe municion luftarak”, njofton policia e Tiranës.
Materialet i kaluan Prokurorisë, për veprime të mëtejshme procedurale.
