Në një komunikim online me gazetarë, kryeministri Edi Rama deklaroi se konsumatorët që do të paguajnë me një cmim tjetër energjie në rast se konsumojnë mbi 800 kw/orë janë rreth 40 mijë, në periudha piku shkon deri në 60 mijë.
Ata që kanë më shumë se një elektroshtëpiake apo një shtëpi jo të zakonshme, tha ai, duhet të paguajnë vetë atë që shpenzojnë dhe jo të tjetër. (nënkupton rritjen e energjisë për të gjithë).
“Janë 1 milion e 90 mijë familje që konsumojnë deri 800 kw/orë dhe 40 mijë familje që konsumojnë mbi 800 kw/orë. Në periudhën e pikut ky 40 mijësh shkon në afro 60 mijë. Vendoseni në shkallë 60 mijë me 1 milion e 90 mijë dhe besoj del rezultati. Kjo është shumë e thjeshtë për njerëzit.
Mbi 800 kw u vendos me logjikën se deri aty mund të plotësohen të gjitha nevojat për konsumin shtëpiak, në kushtet kur s’ka kufizi energjie. Ne kemi vendosur dy gjëra: të mbrojmë cmimin nga rritja për konsumatorët familjarë dhe biznesin e vogël dhe e dyta të mos kufizojmë energjinë elektrike.
Për një pjesë të familjeve që konsumojnë më shumë se 800 kw, sepse kanë më shumë elektroshtëpiake, shtëpi të zakonshme apo për të ngrohur mjedisin ku rrinë, apo të ndricojnë dhomat nuk duhet të paguajnë 1 milion e 90 mijë të tjerë. Këta duhet të paguajën vetë,” tha ai.
