Takimi mes ambasadores së Shteteve të Bashkuara të Amerikës, Yuri Kim, dhe përfaqësues të partive politike në Shqipëri, zgjati rreth 1 orë e gjysmë në zyrat e Komisionit Qendror të Zgjedhjeve.
Përveç kreut të KQZ, Ilirjan Celibashi, në takim morën pjesë edhe Damian Gjiknuri nga Partia Socialiste, Jorida Tabaku nga Partia Demokratike dhe Monika Kryemadhi, nga Partia e Lirisë.
Deputetja demokrate, Jorida Tabaku ka bërë me dije se në takimin me ambasadoren Yuri Kim kanë folur për raportin e SHBA në lidhje me financimin e PD me 500 mijë dollarë nga Rusia dhe qëndrimin larg influencave ruse dhe kineze.
“U diskutua për partitë politike, financimin e tyre dhe qëndrimin larg influencave ruse, kineze, me tepër do ju informoje ambasada”, tha Tabaku pas takimit.
Deputeti i Partisë Socialiste, Damian Gjiknuri theksoi se fokusi i diskutimit ishte mbi raportin e bërë dje publik financimin e partive politike apo organizatave të ndryshme nga Rusia.
“Jemi të angazhuar ndaj çdo lloj akti që tashmë disa prej tyre janë bërë publike, siç është ai i Komunitetit të Inteligjencës. Duhet të marrim shembull se si ne partitë politike të mos përfshihemi në këto financime. Këto janë gjera teknike që do i bëjmë në vijim. Do të forcohen dispozitat për fushatën zgjedhore. Fokusi ishte shqetësimi që kanë aleati jonë, SHBA për përfshirjen e influencave të huaja, kryesisht ruse, në partitë politike, por dhe organizmave mediatike. Nuk ishte biseda teknike, apo masat që do merren. U transmetua shqetësimi që u nis nga raporti i fundit. Këto shqetësime janë reale që këto gjëra mos të përsëriten në të ardhmen.”, tha Gjiknuri.
Gjatë fjalës së saj, Kryemadhi tha se ligji për financim të partive politike ka nevojë për shqyrtim. E ndalur tek financimi i rus për PD, Kryemadhi përdori batutën e famshme të një filmi shqiptar para viteve 90’ se “kushdo që e ka gëlltitur çorbën e prishur, ka për të vjellë gjithë jetën”.
“Është bërë emergjente ngritja e barrierave për mosdepërtimin e financimeve ruse që cënojnë sigurinë e Shqipërisë, aq më shumë në situatën ku gjendemi. mendoj që kjo është ajo që kemi ngritur me kohë. Ka më shumë se 6 vite që flas për influencën ruse në vend. Por më mirë vonë se kurrë. Ka ardhur koha që dy paritë e tjera të marrin eksperiencën e LSI apo Partisë së Lirisë sot, që të gjithë donatorët t’i kenë me emër dhe mbiemër donatorët. Ligji për financimin e partive politike ka nevojë për rishikim. Duke e bërë burokratike stimulohen më shumë paratë e pista. përgëzoj takimin me Kim dhe bashkëpunimi i gjithë partive të vijojë edhe më tutje. Ka një proces që do vazhdojë të hetohet dhe do hetohet edhe jashtë Shqipërisë. Kush e ka gëlltitur lugën e çorbë së prishur ka për të vjedhur gjithë jetën”, tha Kryemadhi.
Një deklaratë mbi takimin u bë edhe nga Komisioneri Shtetëror i Zgjedhjeve, Celibashi, i cili u shpreh: “Nga ambasadorja u përcoll shqetësimi i SHBA-ve si partneri dhe aleati ynë strategjik në lidhje me financimet e huaja të politikës shqiptare, në mënyrë specifike të financimeve ruse. Nën dritën e informacioneve të fundit që ata zotërojnë, përcollën këtë informacion që të rritet vëmendja, për të bërë më mire që financimet e huaja të mos kenë ndikim në politikën shqiptare”.
