Gati një javë pas sulmit kibernetik, sistemet e Policisë vijojnë ende të jenë jo funksionale.
Punonjës pranë komisariateve të ndryshme konfirmuan për “Boldnews.al” se që prej sulmit kibernetik, u janë kthyer shkresave me dorë pa mundur të aksesojnë në sistemet online.
Nga mosfunksionimi i sistemeve preken dhe qytetarët. Një prej shërbimeve që aktualisht nuk arrijnë të marrim është pagesa e gjobave. Në pikat e posaçme të dedikuara për këtë veprimtari, të përcjellin duke të thënë: Gjobat nuk paguhen dot, pasi sistemi i Policisë nuk punon.
E paqartë mbetet situata lidhur me kamatat që parashikohen mbi gjobat, që sipas legjislacionit në fuqi, vlera e penalitetit rritet me 2 përqind deri në 1 muaj. Nuk dihet nëse do të ketë një lloj amnistie për ditët që sistemi është jashtë funksionit, apo kjo rrethanë nuk do të merret parasysh. Zyrtarisht, Policia nuk ka përcjell një komunikim për mënyrën se si do të procedohet.
Sulmi kibernetik u shënua më 9 Shtator, siç konfirmuan autoritetet.
Ministria e Brendshme njoftoi paraditen e 10 Shtatorit se “mbrëmjen e kaluar sistemet e ruajtjes dhe transmetimit të të dhënave në Policinë e Shtetit janë gjendur nën një sulm kibernetik të ngjashëm me atë që pësoi e-Albania në muajin korrik”.
Edhe për këtë rast u akuzua Irani.
Ministrja e Brendshme sqaronte në të njëjtin njoftim se “sistemet, përfshi atë TIMS, kanë qëndruar përkohësisht të mbyllura” për shkaqe sigurie.
Mosaksesi i sistemit TIMS solli problematika në pikat kufitare më 10 Shtator, me qytetarë të shumtë që u shprehën të irrituar me pritjen e gjatë.
Frika se mos hakerat kishin shtënë në dorë informacione sensitive ishte e pranishme. Më vonë gjatë ditës, grupi “homeland justice” mori sërish përsipër sulmin kibernetik dhe la të kuptohet se kishte marrë informacione, duke publikuar në rrjete sociale një video nga sistemin e survejimit me kamera sigurie në Rinas.
Dy ditë më vonë njoftuan se dispononin databazën e sistemit TIMS të policisë shqiptare dhe atë të e-albanias dhe i nxorën në shitje kundrejt monedhave dixhitale.
Një raport i kompanisë Microsoft zbuloi se hakerat që sulmuan e-albanian dhe sistemet e policisë kanë fituar akses në databaza shtetërore shqiptare që prej vitit 2021.
