Zhdukja e Ervis Martinaj ka qenë një ndër temat më të diskutuara javët e fundit. Të shumta kanë qenë hipotezat se çfarë ka ndodhur me Martinajn, ku disa shprehen se është vrarë e disa se ai është zhdukur.
Gazetari Poli Hoxha ka deklaruar se një nga pistat kryesore të policisë në lidhje me të shumëkërkuarin, është se Ervis Martinaj është gjallë dhe ndodhet në një vend të Amerikës Latine.
Në një intervistë për “Euronews Albania”, Hoxha u shpreh se zyrtarë të policisë, por edhe politikanë kanë lidhje me bizneset e Ervis Martinajt.
“Një gjë është e sigurt. Një nga pistat në Drejtorinë e Përgjithshme të Policisë, sepse edhe aty ka një hetim policor, kishte nisur përpara se të ikte Gledis Nano, për fatin e Ervis Martinajt. Një nga pistat kryesore me të dhëna, është që ai ndodhet në një vend të Amerikës Latine. Është shumë e fortë si pistë. Me çështjen e Ervis Marinajt, segmentë të rëndësishëm të policisë janë kokë e këmbë brenda, segmente të biznesit dhe të politikës nga të dyja krahët. Janë të lidhur me bizneset e tij, me mbrojtjen e tij, me marrëdhëniet e tij, ka biseda telefonike”, theksoi gazetari.
