Deputetja e Partisë së Lirisë, Erisa Xhixho këtë të hënë ka dorëzuar në Bashkinë Kamëz një peticion të firmosur nga banorët e zonës, për sa i përket shkollës “Ibrahim Basha” e cila rezulton e mbyllur ditën e parë të hapjes së vitit të ri shkollor.
Në ambientet e Bashkisë Kamëz deputetja Xhixho është përplasur me kryebashiakun Rakip Suli duke i kërkuar llogari këtij të fundit përse nuk hapet shkolla. Siç shihet dhe nga pamjet, Xhixho dhe një grup prindërish qëndrojnë në pjesën e informacionit, kurse kryebashkiaku Rakip Suli u përgjigjet nga brenda xhamit.
“Peticioni i kryer që në mars 2022 nuk ishte marrë në dorëzim nga Bashkia, erdha personalisht që ta prokolloja. Lashë të dhënat e mia që përgjigja të më vijë zyrtarisht. Më thanë që përgjigja do vijë brenda një jave”, thotë Xhixho.
Xhixho ka pasur dhe një debat me kryetarin e Bashkisë Kamzë Rakip Sulin, në sportelet e Bashkisë. Deputetja e ftoi Sulin në një dëgjesë publike me qytetarët për të dikskutuar se kur mund të jetë gati shkolla për zonën, por ai nuk pranoi.
“Kryetari i Bashkisë doli vetë personalisht e ftova publikisht që shqetësimin e qytetarëve ta adresoj e qytetarët donin dhe një dëgjesë me kryetarin për afatet, proceset e tenderimit dhe kur mund ti rikthehen jetës normale, e për pagesat e furgonave që shkojnë 30 mijë lekë në muaj. Rilindja duhet ta kuptojë që koha e llogaridhënies ka ardhur, për cdo investim publik e mos kenë frikë nga llogaridhënia”, tha Xhixho.
Partia e Lirisë e ka ngritur dhe më herët këtë shqetësim, bashkë me prindërit e fëmijëve që shkolloheshin në këto ambiente. Prej muajit Mars kjo shkollë është mbyllur me argumentin që do i nënshtrohet rikonstruksionit. Banorët thonë se askush nuk është shfaqur në godinë për të nisur punimet ndaj ata kanë firmosur një peticion dhe kërkojnë të dinë afatet se sa do të qëndrojë e mbyllur shkolla.
