Nga BoldNews.al
Së bashku me zhegun e nxehtë të stinës së verës, që po vazhdon pa ndalim edhe në këtë mes Shtatori, qytetarët e Tiranës janë detyruar të durojnë edhe nxehtësinë, pluhurin dhe bllokimin e trafikut nga betonierët dhe kamionët e mëdhenj plot inerte. I gjen kudo, në qendër të kryeqytetit, në Unazën e vogël, atë të madhe, në çdo kryqëzim kryesor, deri në periferinë më të largët.
Fundjava është e gjitha për betonierët. Kompanitë e ndërtimit u falen një Urdhëri dashamirës të kryetarit të Bashkisë së Tiranës, i cili i lejon të qarkullojnë në çdo cep të qytetit, në çdo orë të ditës, nga e Premtja pasdite deri të dielën në mes të natës. Në fillimi të Korrikut, kryetari i Bashkisë, Erion Veliaj, modifikoi një urdhër të mëparshëm të nxjerrë po nga vetë ai, duke i lejuar makinerive bisha që të pushtojnë rrugët e Tiranës për 24 orë.
Lejohet qarkullimi i mjeteve në funksion të ndërtimit gjatë fundjavave, “duke nisur nga ora 18 e mbrëmjes së të Premtes, deri ditën e Hënë në orën 7 të mëngjesit”, shkruan Veliaj në Urdhëresën e nënshkruar në datë 7 Korrik 2022. Sipas Veliajt, kjo leje do të jetë në funksion të procesit të Rindërtimit, që sipas tij është shtrirë në pjesë të ndryshme të Tiranës, pas tërmetit të 26 nëntorit 2019.
Shenjat e Rindërtimit në Tiranë janë me pikatore, me disa objekte që kanë nisur, por ende nuk janë bitisur tek “5 Maji”, ndërkohë që në Kombinat ende nuk është hapur asnjë gropë për pallatet e reja.
Por, ndërkohë që godinat e Rindërtimit numërohen me gishtat e dorës, betonieret kanë pushtuar çdo aks rrugor dhe kantier ndërtimi privat në Tiranë.
Makineritë e rënda i sheh pranë kullave që po ndërtohen nga oligarkët e ndërtimit apo në çdo gropë pallatesh që ndërtohen me financime private.
Për të mbërritur në destinacionet e tyre, mjetet e rënda qarkullojnë në çdo rrugë e rrugicë, duke ua vështirësuar si përherë jetën qytetarëve dhe sidomos përdoruesve të rrugës në Tiranë.
Betonierët janë “mbretër të rrugës” në kryeqytetin shqiptar.
Shtëllyngat e tymit dhe pluhurit të lëshuara prej tyre janë ‘dhurata” më e mirë që u bën kryebashkiaku Veliaj banorëve të “kryeqytetin e Rinisë”, siç pëlqen ta thotë shpesh kryebashkiaku
