Enkeljed Alibeaj zgjodhi kryesinë e Kuvendit për të mbajtur një takim me disa deputetë të Partisë Demokratike këtë të Hënë, kur nis dhe sesioni i ri parlamentar.
Pas takimit, ku sipas të dhënave paraprake morën pjesë 16 deputetë, mbajti edhe një konferencë për mediat për gazetarët, shoqëruar nga deputetët Agron Gjekmarkaj, Flutura Açka dhe Dhurata Çupi. Alibeaj, foli si kryetar i grupit parlamentar të Partisë Demokratike, duke listuar prioritetet për sesionin e ri. Ndërkohë, nga kampi tjetër i PD, ai është i shkarkuar dhe pritet të zëvendësohet nga Luçiano Boçi. Kështu ka deklaruar kryetari i partisë Sali Berisha.
Gjatë fjalës së tij, Alibeaj tha se prioritete absolute mbeten reformat zgjedhore dhe administrative dhe lajmëroi se këtë muaj do të nisin diskutimet publike për këto çështje.
Çështje të tjerë që përmendi ishte dekomunistizimi, foli për reforma antikorrupsion dhe kundër krimit të organizuar.
“Në qendër të grupit kanë qenë dhe mbeten nevojat emergjente të popullit shqiptar, paketa ekonomike dhe energjetike”, tha ai.
Prioritet tjetër listoi “paketën e integrimit tonë kombëtar”. “Do ngremë grup pune me ekspertë për të ecur me ritmet e duhura për integrimin europian”, tha ai.
Një tjetër pikë me rëndësi sipas tij, për grupin parlamentar, është dhe edhe ruajtja e partneritetit strategjik me SHBA dhe BE.
Po ashtu, tha se grupi i PD do të fokusohet edhe në kontrollin parlamentar mbi aferat e qeverisë. “Do nisë duke pasur parasysh suksesin e komisionin hetimor për inceneratorët që vërtetoi aferën 430 milion euro”, u shpreh.
Pas deklaratës, pranoi disa pyetje nga gazetarët të cilët prekën dhe konfliktin në PD dhe raportin me kreun e partisë Sali Berisha, megjithatë Alibeaj u tregua i ngurtë në përgjigje duke theksuar disa herë se rëndësi kanë prioritetet e shpalosura.
“Çoroditja na ka frenuar për të bërë një opozitë serioze, siç kapacitetet e një grupit parlamentar janë. Prioritetet tona në vetvete janë një thirrje për këdo, deputetëve për të mbështetur pikërisht këto që janë prioritetet… Do vijë një moment kur do të kthjellohen kokat…”, tha ai.
Interesit të gazetarëve nëse do të mbështesë nismën e PS-së për ish-bashkëpunëtorët e ish-Sigurimit të Shtetit, Alibeaj iu përgjigj duke thënë se vetë PD ka një paketë të dekomunistizimit dhe do jetë ajo që do mbështetet.
I pyetur nëse platforma e shpalosur duhet të marrë aprovimin e shumicës së deputetëve duke i kujtuar se në mbledhje ishin vetëm 16 ligjvënës demokratë, Alibeaj tha se shërbimi më i mirë që i bëhet Ramës është kur flitet për numra.
Mbledhjen e disa ditëve më parë, kur u raportua se ai u konfirmua si kryetar grupi i PD, Alibeaj e sfumoi disi duke thënë se ishte miqësore mes kolegësh.
I pyetur pse s’mblidhen në selinë blu, ai tha: Është çështje e qartë… Qëndrimi dhe prania e deputetëve është të fokusohemi te këto prioritete.
