Protestuesit e mbledhur në Sheshin Nënë Tereza kundër përdhunimit të 11-vjeçares në kosovë, kanë vendosur që të zhvendosen dhe me parrulla në duar të marshojnë drejt kryeministrisë.
Ishte, këngëtarja Filloreta Raçi, e njohur me emerin e artit Fifi, ajo e cila në përfundim të protestës kërkoi që protestuesit të marshojnë drejt selisë së qeverisë për të bërë që thirrjet e tyre të dëgjohen.
“Vazhdojmë me një marsh drejt kryeministrisë, pa probleme me ovacionet tona”, tha Fifi.
Gjithashtu gjatë fjalës së saj këngëtarja tha se ngjarja ka ndodhur në qytetin ku ajo ka lindur dhe është rritur, Prishtinë.
Ajo shtoi se trauma e lënë nga ngjarja e rëndë bëjnë që motra dhe mbesa e saj që jetojnë ende në kryeqytetin e Kosovës të mos guxojnë të dalin nga shtëpia.
“Veç statuse në instagrama dhe facebook bëjnë disa. E kanë përdhunuar midis Prishtine ku jam rrit unë dhe nuk guxon me dal motra jeme, mbesa jeme”, tha Fifi.
Kujtojmë se 11-vjeçarja në Kosovë u përdhunua për 7 orë nga 5 persona të cilën e kontaktuan fillimisht në një park dhe më pas e transferuan në një vend tjetër ku kryen dhe abuzimin seksual.
