Ukrainë – I gjunjëzuar mbi një fushë me lule të egra të verdha, një ushtar çeçen vendos me kujdes një pajisje shpërthyese në fund të një droni të vogël. Disa sekonda më vonë, e lëshon. Ajo shpërthen pranë dy manekineve të vjetra të vendosura 200 metra larg, një prej tyre me një kapelë ushtarake të stilit rus në kokë.
Pas kësaj dhe stërvitjeve të tjera jashtë kryeqytetit ukrainas, ushtarët çeçenë, me këpucë të ndryshme kamuflazhi dhe pajisje mbrojtëse, do të shkojnë në vijën e parë të frontit në Ukrainë, duke u zotuar të vazhdojnë luftën kundër Rusisë që u ndez për vite në atdheun e tyre në Kaukazin e Veriut.
Luftëtarët nga Çeçenia, republika e shkatërruar nga lufta në jug të Rusisë, janë përfshirë në të dyja anët e konfliktit në Ukrainë.
Vullnetarët pro-Kievit janë besnikë ndaj Dzhokhar Dudayev, liderit të ndjerë çeçen, i cili kryesoi përpjekjet e kësaj republike për pavarësi nga Rusia. Ata formuan “Batalionin Dudayev” dhe janë armiqtë e betuar të forcave çeçene që mbështesin Presidentin rus Vladimir Putin dhe që i bashkuan me Rusinë në rrethimin disamujor të portit kyç të Ukrainës, Mariupolit dhe vatrave të tjera të nxehta në lindje dhe jug të Ukrainës.
Një grup çeçenësh të sapoardhur, shumë prej të cilëve jetojnë në Evropën Perëndimore, stërviten në një poligon të improvizuar jashtë Kievit përpara se të nisen drejt lindjes.
Në një seancë stërvitore të shtunën, rekrutët e rinj – të gjithë burra myslimanë – thërrisnin “Allahu akbar!” (“Zoti është i madh!”), duke ngritur pushkët në ajër përpara se t’u jepeshin kartat e identitetit ushtarak që u lëshohen vullnetarëve.
Zyrtarët ukrainas thonë se batalioni çeçen aktualisht numëron disa qindra që luftojnë së bashku me ushtrinë e vendit, por nuk janë zyrtarisht nën komandën kombëtare.
Instruktorët u mësojnë anëtarëve të batalionit të ri bazat e luftimit, duke përfshirë mënyrën e përdorimit të një arme, marrjen e një pozicioni të qitjes dhe si të punojnë në ekipe.
Trajnerët janë veteranë të luftërave në Çeçeni që përfunduan në 2009, disa erdhën në Ukrainë pasi luftimet kundër separatistëve të mbështetur nga Rusia filluan në këtë vend në vitin 2014.
Tor, një vullnetar që kërkoi vetëm të identifikohej me pseudonimin e tij në fushën e betejës, tha se nuk sheh asnjë ndryshim midis dy konflikteve. “Njerëzit duhet të kuptojnë se ne nuk kemi zgjidhje,” tha ai duke folur në anglisht dhe me fytyrën e mbuluar.
“Nëse forcat ruse e fitojnë këtë luftë, ato do të vazhdojnë. Ato nuk ndalen kurrë. Unë nuk e di. Vendet baltike do të jenë të radhës, ose Gjeorgjia ose Kazakistani. Putini haptazi, absolutisht, thotë se dëshiron të rindërtojë perandorinë sovjetike.”
Muslim Madiev, një luftëtar veteran i konflikteve çeçene, e identifikoi veten si këshilltar i batalionit vullnetar në Ukrainë. Ai u bashkua me ushtarët të shtunën në praktikën e qitjes, duke vënë në shënjestër një shishe plastike të mbajtur në një shkop. Gëzhojat e plumbave fluturuan nga pushka e tij automatike në një fushë tashmë të mbushur me plumba, gëzhoja pushke gjahu dhe fletë kartoni.
“Ne do ta fitojmë këtë luftë. E gjithë bota tashmë po ngrihet për ne”, thotë ai duke folur në rusisht. “Ne ishim të vetmit që luftuam për veten tonë në Çeçeni. Askush nuk qe me ne. Por tani e gjithë bota është me Ukrainën. Duhet të fitojmë, duhet të fitojmë”, deklaroi ai.
