Një sasi prej 202 060 eurosh është sekuestruar në pikën kufitare të Muriqanit, pasi siç bën me dije policia, nuk është deklaruar te autoritetet doganore. Për poseduesin: Ilir Beqiri, 53-vjeç, ka nisur procedimi penal.
Shuma e parave, sipas hetimeve paraprake, dyshohet se është përfituar nga aktivitete kriminale.
“Shërbimet e PKK Muriqan, në bashkëpunim me homologët në Mal të Zi dhe me specialistët e Seksionit për Hetimin e Krimit Ekonomik e Financiar në DVP Shkodër, në dalje të RSH-së, kanë kaluar në vijën e dytë, për kontroll më të imtësishëm, automjetin tip ‘Benz’’ me drejtues shtetasin I.B.. Gjatë kontrollit të ushtruar në automjetin që drejtonte ky shtetas, shërbimet e Policisë Kufitare gjetën dhe sekuestruan 202 060 euro, të cilat ky shtetas nuk i kishte deklaruar sipas përcaktimeve ligjore në fuqi. Gjithashtu, kjo shumë parash dyshohet se është përfituar nga veprimtari kriminale”, njoftoi policia.
“Në përfundim të veprimeve hetimore, specialistët e Seksionit për Hetimin e Krimit Ekonomik e Financiar në DVP Shkodër referuan materialet në Prokurori dhe nisi procedimi penal në gjendje të lirë për shtetasin I.B., 53 vjeç, banues në Shkodër, për veprat penale ‘Mosdeklarimi në kufi i të hollave dhe i sendeve me vlerë’ dhe ‘Pastrimi i produkteve të veprës penale ose veprimtarisë kriminale”, shtuan të nëjtat burime.
Specialistët e Seksionit për Hetimin e Krimit Ekonomik e Financiar në DVP Shkodër, në bashkëpunim me Prokurorinë e Rrethit Gjyqësor Shkodër, vijojnë punën për zbardhjen dhe dokumentimin e plotë ligjor të këtij rasti, mbyllet njoftimi i bluve.
