Policia ka arrestuar një 39-vjeçare e cila dyshohet se ka ndihmuar autorin e plagosjes së Renaldo Mejdanit disa netë më parë në zonën e Alliasit në Tiranë.
Në pranga është vendosur O.I., e cila në bashkëpunim me Dorjan Ostenin, akuzohen se ndihmuan Albert Ostenin që të largohet nga vendngjarja.
Gjithashtu sipas bluve, shtetasja 39-vjeçare ka dhënë deklarim të rremë në polici.
“Në vijim të informacioneve të dhëna gjatë këtyre ditëve, në lidhje me plagosjen me armë zjarri të shtetasit R. M., 23 vjeç, ju bëjmë me dije se: Pas referimit të materialeve dhe shpalljes në kërkim të autorit të dyshuar, shtetasit A.O., 49 vjeç, si dhe arrestimit të shtetasit D.O., 45 vjeç, për veprat penale ‘Përkrahja e autorit të krimit’ dhe ‘Veprime që pengojnë zbulimin e së vërtetës”’ specialistët për Hetimin e Krimeve në Komisariatin e Policisë Nr. 4 kanë arrestuar shtetasen O.I., 39 vjeçe, pasi dyshohet se në bashkëpunim me shtetasin D.O., 39-vjeçarja ka penguar zbulimin e së vërtetës, ka ndihmuar autorin e dyshuar të plagosjes të largohet nga vendi i ngjarjes, si dhe ka dhënë deklarim të rremë para oficerit të Policisë Gjyqësore. Për këtë ngjarje, vijon puna intensive për lokalizimin dhe kapjen e shtetasit A.O.”, njofton policia.
Ngjarja
Policia e Tiranës njoftoi mbrëmjen e së martës së në Allias pas një konflikti të çastit ishte plagosur Renaldo Mejdan, 23 vjeç. Policia tha se kishte shpallur në kërkim autorin, një 49-vjeçar që u identifikua si Albert Osteni. Pasi u morën dëshmitë e para u mësua se në fakt i riu ka qenë jo në lokal për në banesën e familjes Osteni.
Ai ka qenë duke luajtur letra me Albertin kur ka nisur edhe sherri dhe më pas në grindje e sipër Alberti ka marrë armën, pistoletë, dhe ka qëlluar mbi të. Por, Policia kur ka mësuar detajet e krimit ka shkuar sërish në banesën e autorit e për pasojë kanë kërkuar hapjen e kamerave të sigurisë së ndërtesës.
Kanë parë që materiale kanë qenë të fshira e për pasojë ata kanë vënë në pranga për fshehje të së vërtetës, vëllanë e autorit, Dorjan Ostenin, i cili ka mohuar të kishte ndërhyrë në sistem.
Policia saktësoi se ngjarja dyshohet të ketë ndodhur pas një konflikti të çastit, pasi personat e përfshirë kanë qenë duke luajtur me letra në shtëpinë e autorit, ku ka dy kamera sigurie që kanë filmuar pamjet, por janë marrë nga vëllai i autorit dhe janë fshehur.
Ndërkohë, policia ka arrestuar vëllanë e tij, pasi ka fshehur provat, gëzhojën dhe DVR e kamerave te sigurisë.
Në banesën e autorit janë gjetur edhe rreth 50 fishekë 9 mm dhe një sasi lënde narkotike.
