Ministria e Bujqësisë, e drejtuar nga Frida Krifca, ka reaguar pas një investigimi të BoldNews.al, për një projekt zgjerimi për Portin e Peshkimit brenda Portit të Durrësit.
Investimi 1.6 milionë euro synonte zgjerimin e këtij porti, por që mbivendosej me projektin 2 miliardë euro të Marinës së Durrësit.
Redaksia jonë analizoi fotot e paraqitura të Marinës, të cilat kushdo mund t’i shohë në internet, me fotot e këtij tenderi, ku duket mjaft qartë se edhe Porti i Peshkimit ishte pjesë e këtij projekti.
Por, Ministria e Bujqësisë e mohon, teksa në një reagim shprehet se Ministrja e Infrastrukturës dhe Energjisë, Belinda Balluku, a ka lënë jashtë projektit Portin e Peshkimit!
Në reagimin për BoldNews.al, Ministria e Bujqësisë thotë se “Porti i Peshkimit Durrës nuk është pjesë e portit tregtar Durrës dhe nuk preket në asnjë pjesë të tij nga projekti i strategjik i portit të Durrësit”.
Më tej, pohon se nga projekti i Marinës, në Portin e Peshkimit nuk është parashikuar asnjë zhvillim.
“Investimet e parashikuara nga Ministria e Bujqësisë dhe Zhvillimit Rural kanë për qëllim rritjen e kapaciteteve ankoruese të portit të peshkimit Durrës, i cili me zhvillimin e sektorit të peshkimit në vitet e fundit duhet të përballojë një fluks më të madh të anijeve të peshkimit në periudhën afatmesme dhe afatgjatë”, thotë Ministria e Bujqësisë, teksa sipas logjikës së tyre rezulton se ngjitur me rezidencat e arabëve do të ketë edhe një port peshkimi, një hambar për depozitimin e produkteve të detit!
Reagimi i ministrisë – “Porti i peshkimit Durrës është në përgjegjësi administrimi të Ministrisë Bujqësisë dhe Zhvillimit Rural për Drejtorinë e Shërbimeve të Peshkimit dhe Akuakulturës me VKM nr. 182, datë 28.3.2018 të Këshillit të Ministrave “Për disa shtesa në Vendimin nr. 613, date 27.10.2017 të Këshillit të Ministrave “Për miratimin e listave te inventarëve të pronave te paluajtshme shtetërore, te cilat u kalojnë ne përgjegjësi Ministrisë së Bujqësisë dhe Zhvillimit Rural, për Drejtorinë e Shërbimeve të Peshkimit dhe Akuakulturës “. Porti i peshkimit Durrës në zonën kadastrale 8514 me nr. Pasurie 14/42/ND, vol 41, faqet 89- 97, nuk është pjesë e portit tregtar Durrës dhe nuk preket në asnjë pjesë të tij nga projekti i strategjik i portit të Durrësit. Nga projekti i Marinës, nw portin e peshkimit nuk wshtw parashikuar asnjw zhvillim. Investimet e parashikuara nga Ministria e Bujqwsisw dhe Zhvillimit Rural kanë për qëllim rritjen e kapaciteteve ankoruese të portit të peshkimit Durrës, i cili me zhvillimin e sektorit të peshkimit në vitet e fundit duhet të përballojë një fluks më të madh të anijeve të peshkimit në periudhën afatmesme dhe afatgjatë”, thuhet në reagimin e MB.
Megjithatë, më poshtë ju ftojmë të lexoni investigimin e BoldNews.al, për këtë projekt:
Frida Krifca,1.6 mln € për zgjerimin e Portit të Peshkimit brenda Portit të Durrësit
