Kryetari i Partisë së Lirisë Ilir Meta, në një konferencë për mediat këtë të hënë, tha se më 1 shtator do të ngrejë padi penale kundër Autoritetetit të Dosjeve të ish Sigurimit të Shtetit.
“Lidhur me këtë ëndrrën e fundit të pejllave më të veveritshme të ish Sigurimit e partisë së Kristaqit dhe Kolekës do u them se më 1 shtator, do të padis penalisht Autoritetin e Manipulimit të Dosjeve për shkelje flagrante dhe të vetëdijshme të ligjit organik të dojsve për falsifikime të provuara dhe të qëllimshme të dosjes së qytetarit. Jo vetëm kaq, por dhe për manipulim dhe nxjerrjes se sekreteve shtetërore në publik se ishin materiale të klasifikuar. Juristët e mi po punojnë për këtë qëllim”, tha Meta.
Ai deklaroi se rasti i Autoritetit të Dosjeve është një shembull i përdorimit të institucioneve për qëllime kriminale.
Meta u shpreh se përpjekjet e maxhorancës sot për të manipuluar çështjet në favor të tyre ia kalojnë edhe Partisë së Punës.
“Jam njohur me dosjen e përndjekjes së qytetarit F.T. nga sigurimi I shtetit. Nuk ka asnjë dosje për përndjekje nga shtetasi Ilir Rexhep Metaj. Ua kam treguar edhe origjinën që nga çerdhja deri te pazari i ri. Është e qartë. Është një çështje me të cilën do të njiheni edhe ju. Edi Rama do të ketë edhe një akuzë më të rëndë sepse ka urdhëruar falsifikim në dosjen e një qytetari. Unë e di shumë mirë pse e ka bërë ai. Për shkak të veprimeve të përgjegjeshme të presidentit të republikës në mbrojtje të kushtetutës, të cenuara nga Edi Rama si kryeministër në shërbim të qarqeve anti-shqiptare. Këto përralla dhe lojëra nuk funksionojnë me Ilir Metën. Nuk I kanë funksionuar askujt. I.M. do të dalë spiuni ambulant Tao Tao. Një kameleon në shërbim të atij që i ofron një tender dhe një mundësi më të mirë për të jetuar. Ky rast i autoritetit të dosjeve do të jetë një rast ekzemplar se si keqpërdoret në mënyrë kriminale që duhet të jetë shembull i zbatimit të ligjit. Duhet të karakterizohet nga humanizmi dhe jo të cenojë privatësinë e qytetarëve thjesht për t’i shërbyer Edi Ramës nga tmerri që ka që nuk e blen dot më opozitën. Do të jetë një rast skandaloz i përdorimit të metodave më të ndyra të ish sigurimit të shtetit pas 32 vitesh demokraci. Përpjekja e tyre është të shtyjnë çdo ditë me këto historitë. I bëjnë këta që ia kanë kaluar edhe Partisë së Punës. Jemi vend anëtar i NATO-s. Dhe i përdorin këto që të shpëtojnë nga ndëshkueshmëria e shpejtë që i pret. Me ligjet që kanë shkelur vetë do të përgjigjen para ligjit. Dhe do kthejnë çdo cent”, tha Meta.
Më herët, Autoriteti i Dosjeve, në disa shkresa drejtuar Kuvendit ka pohuar se Meta ka qenë bashkëpunëtor i ish-Sigurimit të sistemit komunist. Akuza është mohuar nga Meta, i cili ka deklaruar se kemi të bëjmë për një manipulim për llogari të Ramës. “Nuk ka dhe nuk ka pasur asnjëherë dosje për Ilir Rexhep Metaj“, theksoi ish-kreu i shtetit këtë të Hënë.
Gjatë fjalës së tij, Meta ka akuzuar kryeministrin Edi Rama për korrupsion. Ai i bëri thirrje punonjësve të administratës që të mos bëhen pjesë e korrupsionit të Ramës.
“Mos u bëni pjesë e korrupsionit të Ramës, mos dëmtoni veten tuaj, mos dëmtoni familjet tuaja, respektoni ligjin. Bëni gjithçka për të qenë korrekt me ligjin, ditët dhe javët e Ramës janë të numëruara. Ky korrupsion nuk do të tolerohet gjithsesi”, u shpreh ai.
