Kreu i Partisë Demokratike, Sali Berisha shprehu hapur kundërshtimin për nismën qeveritare, që parashikon pasjen me pasaporta shqiptare të investitorëve të huaj dhe të pasur.
Berisha, në deklaratën e përjavshme për mediat këtë të Premte, theksoi se këto praktika do kundërshtohen më gjithë potencialin që ka opozita.
“Paralajmëroj çdo person, aplikimi mbi bazën e kësaj praktike s’do të njihet nga opozita shqiptare, ndaj të mos bien pre e një skemë të madhe mashtrimi”, u shpreh kryetari i PD-së.
Sipas tij, përmes kësaj nisme, personave të botës së krimit, madje edhe terroristë u hapen dyert për të marrë pasaportën shqiptare.
“Është thjeshte një thirrje narkotrafikant dhe kriminelë të të gjithë rajonit, bashkohuni në Shqipëri. Është mekanizmi i fundit të shtrimit të Shqipërisë në parajsën e drogës dhe krimit rajonal botëror. Pasaporta e dhënë në vendet ku shteti ligjor funksionon është një mundësi e përdorur nga ato qeveri për të thithur investime të huaja, kurse në narkoshtetin e parë dhe të vetëm si Shqipëria, është një kanal i zi për të larë narkoeurot e trafikantëve të pashpirt të rajonit e botës, është kanal i zi për paranë toksike të bosëve të drogës dhe krimit, para e cila me kullat korruptive po shkatërron sot Tiranën… Pasaporta e artë në një narkoshteti si Shqipëria është mekanizëm shtesë vdeksor për konkurrencën e ndershme në vend”, tha Berisha.
Për nismën, kundërshti shprehu edhe Delegacioni i Bashkimit Evropian në Tiranë, duke deklaruar se përbën rrezik për vendin si dhe mund të ndikojë lëvizjen e lirë të qytetarëve shqiptarë në zonën Schengen.
