Kreu i Partisë së Lirisë Ilir Meta ka publikuar dy fotografi në rrjetin social FB, ku shprehet se Edi Rama ka qenë karikaturist i sistemit komunist.
Në foton e parë është kopertina e revistës propagandistike të sistemit të kohës “Në shërbim të popullit”. Në pjesën e sipërme të kopertinës, nga ana e djathtë, shquhet data e publikimit: 10 Tetor 1983. Meta publikon një tjetër foto, sipas tij një faqe e brendisë së revistës. Në të ka një karikaturë ku duket se autori e ka shënjuar veprën me mbishkrimin “E.Rama”.
Sipas ish-Presidentit, personi në fjalë që ka realizuar karikaturën për revistën e sistemit komunist është pikërisht kryeministri Edi Rama.
“Partia e Punës e kishte Edi Ramën karikaturistin e preferuar të shkrimeve propagandistike kushtuar Sigurimit dhe spiunazhit. Ndërsa Partia Socialiste e ka Edi Ramën, Kryetarin e bandës së inceneratorëve. Pikërisht këtu do të fokusohemi dhe ne për të zbardhur grabitjet e tij galopante dhe për t’i dhënë ndëshkimin e merituar”, shkruan Meta në rrjetin sociale.
Ndërsa fotografitë i shpjegon në këtë mënyrë: Në foto: (Karikatura e Edi Ramës në revistën “Në shërbim të popullit”, 10 tetor 1983)
Më herët, Meta e ka akuzuar Ramën se po manipulon duke shpikur se ndaj ish-kreut të Shtetit ka një dosje që tregon se ka qenë bashkëpunëtor i ish-Sigurimit të Shtetit.
