Socialistët përmes Taulant Ballës, kreut të Grupit Parlamentar të PS, vijojnë lojën e tyre me grupimet brenda opozitës.
Pavarësisht se Kryeministri Edi Rama, për herë të parë, përjashtoi opozitën nga një zhvillim përtej politikës së brendshme, sikundër ishte konferenca e Parë Ndërqeveritare për çeljen e negociatave të anëtarësimit të Shqipërisë në BE, sot Taulant Balla zgjodhi të vijojë lojën duke përcaktuar se kush përbën opozitë për ta, dhe kë përjashtojnë ata nga bashkëpunimi.
Në një prononcim për gazetarët, ai tha se në tryeza të tjera dera për opozitën është e hapur. Por sipas tij, PS dhe qeveria do të bashkëpunojë vetëm me grupin që përfaqësohet nga Enkelejd Alibeaj dhe jo atë të drejtuar nga Sali Berisha.
“Konferenca e parë ndërqeveritare ka definicion të qartë. Do kemi mundësi të tjera ku do të jemi bashkë maxhorancë dhe opozitë në Parlamentin Europian dhe në këtë kontekst nuk i heq asnjë pikë dhe asnjë presje nevojës që e ka shprehur edhe kryeministri në fjalën e tij, ku tha se duhet të kishim edhe opozitën. Flas për atë opozitë të përgjegjshme, nuk flas për një element të caktuar të opozitës që i ka shpallur luftë aleatëve të Shqipërisë. Në këtë kuptim ftesa është e sinqertë. E bëri kryeministri sot në atë moment solemn. Ajo është një fitore e gjithë shqiptarëve”, tha Balla.
Pavarësisht se kreu i deputetëve socialistë nuk ka përmendur emrin e Enkelejd Alibeajt, ky i fundit vijon të trajtohet dhe njihet nga PS, si kreu i Grupit Parlamentar të PD, madje edhe si drejtues i kësaj partie, i komanduar nga Gazment Bardhi.
