Janë publikuar 5 aktet që janë hartuar nga Ministria e Financave në lidhje me lojërat e fatit, të cilat duket se kanë mbetur thjesht në letër pasi në praktikë asnjëra nuk është vendosur në praktikë. Pesë aktet janë:
1. Projektvendimi për pezullimin/revokimin e licencave të basteve online
2. Projektvendimi për administrimin e Fondit të Posaçëm të lojërave të fatit
3. Projektvendimi për krijimin e Regjistrit Elektronik të personave të ndaluar
4. Projektvendimi për rregullat e Këshillit të Mbështetjes së Projekteve
5. Udhëzimi i tetorit 2024 për përshtatjen me ligjin e ri të kumarit
Pra, në letër gjithçka duket gati. Në praktikë asgjë nuk ka hyrë në funksion real.
-Asnjë licencë nuk është dhënë. Asnjë operator nuk ka hyrë në skemën e re fiskale.
-Asnjë aksion masiv kundër pikave të paligjshme nuk është kryer.
-Dhe tregu i zi vazhdon të lulëzojë i paprekur.
Pas Rinasit perceptim i fortë i “aksioneve”, por mungesë e theksuar e rezultateve strukturore
Pas atentatit në Rinas, qeveria e ka shfrytëzuar momentin për të sinjalizuar se “po godet krimin”. Kontrolle në terren, deklarata politike, retorikë kundër grupeve kriminale. Por vetëm perceptim nuk është politikë publike.
Dhe kur analizon sektorin ku qarkullon një nga vlerat më të mëdha të parasë së zezë lojërat e fatit, panorama është krejt tjetër:
• ligji i ri nuk zbatohet,
• aktet ecin ngadalë,
• struktura e mbikëqyrjes nuk po krijohet,
• licencat nuk shpallen,
• tregu i paligjshëm vazhdon pa asnjë shqetësim.
Besojmë vërtet se shteti nuk është në gjendje të finalizojë një proces ligjor të bërë gati? Apo ka interesa më të thella?
Pse vonohet zbatimi i ligjit që prek miliarda euro?
Kumar i paligjshëm lëvizin shuma që i tejkalojnë disa sektorë të ekonomisë shqiptare. Pengesat teknike nëse do të kishte do të zgjidheshin brenda javësh. Por vonesa vazhdon muaj pas muaji. Këtu lind dyshimi më i rëndë:
A po shtyhet me qëllim miratimi i licencave dhe hyrja në fuqi e sistemit të ri që të ketë kohë të mbyllen, të zhduken dhe të “pastrohen” hesapet e tregut të paligjshëm?
Sepse një gjë është e qartë:
• Derisa të mos ketë licenca të reja,
• derisa tregu të mos ketë strukturë ligjore funksionale,
• derisa qeveria të mos vendosë operatorët në sistem fiskal, të gjitha miliardat që luhen sot lëvizin në një territor ku askush nuk mban përgjegjësi.
Atentatet si ai në Rinas nuk lindin në ajër – shpesh lidhen me para, borxhe, tregje të paligjshme
Edhe pse hetimet për atentatin ndaj Danit dhe Sheqerit janë në proces, askush nuk e përjashton dot pistën e kumarit:
• borxhe të mëdha,
• ndarje tregu
• prishje pazari,
• kontroll zonash,
• përplasje midis rrjeteve të basteve ilegale.
Në vendet ku tregu i basteve është informal, pa kontroll dhe pa licenca, konfliktet e tipit “larje hesapesh” nuk janë të rralla janë pjesë e modelit.
Dhe Shqipëria sot ndodhet pikërisht në këtë fazë.
Qeveria po ecën ngadalë atje ku duhen hapa të shpejtë Në dukje, qeveria po merr masa pas atentateve. Në realitet, aty ku duhet transparencë dhe vendimmarrje tek lojërat e fatit procesi është lënë në “ngrirje”.
Dhe kur vonesa prek një sektor ku qarkullojnë miliarda euro, pyetja nuk është më teknike është politike: A po mbahet pezull ligji për lojërat e fatit që të rregullohen më parë hesapet në tregun e paligjshëm, para se të hyjnë operatorët zyrtarë? Derisa të ketë përgjigje, çdo deklaratë për “luftë kundër krimit” mbetet vetëm spektakël. Ndërsa realiteti i kumarit një nga burimet kryesore të parasë së zezë vazhdon i paprekur.
/Publik.al
