Debatin për zgjedhjet parlamentare të 11 Majit, opozita dhe mazhoranca e kanë zhvendosur në Strasburg në takimin e 19-të të Komitetit Parlamentar të Stabilizim Asociimit.
Fillimisht ishte deputetja demokrate Jorida Tabaku, e cila deklaroi se në 12 vitet e fundit parlamenti shqiptar nuk ka arritur të bëjë asnjëherë një reformë të plotë zgjedhore.
Tabakut i është përgjigjur ministri Taulant Balla, i cili gjatë fjalës së tij tha se për Reformën Zgjedhore duhet një konsesus dhe pala që ai përfaqëson është e hapur që të nisi në Shtator. Nga ana tjetër Tabaku tha se puna për Reformën Zgjedhore do duhet të fillonte 10 vite më parë dhe jo në shtator.
Jorida Tabaku: Më vjen keq të them që për 12 vitet e fundit parlamenti nuk ka qenë në gjendje të bëjë një reformë të plotë elektorale dhe ka të bëjë me vullnetin politik. Opozita e ka mbështetur procesin e integrimit dhe jo me fjalë por me veprime konkrete. Askush nuk ka nevojë për një proces ku gjërat ndodhin vetëm në letër dhe nuk reflektohen në terren. Duhet diskutuar për problemet që sjellin zgjedhjet.
Taulant Balla: Ritheksojmë nevojën për të filluar në shtator dhe vijuar me Reformën elektorale. Në reformën tjetër duhet të kemi dispozita në Kodin Elektoral për nënyrën se si zgjidhen anëtarët e Parlamentit Europian. Neve kemi diçka që mund të pajtohemi dhe të biem dakort me njëri-tjetrin. Duhet të vazhdojmë me depolitizimin e Komisioneve zgjedhore në nivelin e dytë. Duke filluar nga shtatori ne bëjmë gjithmonë të njëjtën gjë lidhur me këtë çështje, duhet me një konsensus siç e kërkon reforma elektorale.
Jorida Tabaku: Nga 2013 Shqipëria nuk ka trajtuar rekomandimet prioritare te ODIHR, në parlament nuk është diskutuar kjo reformë e plotë. Ajo që kemi bërë vitin e kaluar ka qënë thjesht zbatim i vendimt të Gjykatës Kushtetuese që ishte vonuar me një vit. Të gjitha rekomandimet prioritare nuk janë trajtuar dhe kjo detyrë nuk duhet të fillojë në shtator por duhet të kishte filluar 10 vite më parë. Ndryshimet në Kodin Zgjedhor duhet të bëhen në mënyrë konsensuale, jo siç e bëri kjo qeveri në 2021-shin.
