Kryeministri Edi Rama reagoi i lumtur sot pas vendimit të Parlamentit të Maqedonisë së Veriut për të pranuar propozimin francez, si rrugëzgjidhje e konfliktit me Bullgarinë.
Sipas Ramës, tashmë negociatat kanë marrë dritën jeshile dhe javën e ardhshme, delegacioni shqiptar do të udhëtojë drejt Brukselit për tryezën e parë ndërqeveritare.
Në fakt nëse i referohemi deklaratave të Ramës të 4 viteve më parë, atëherë kur u hapën edhe shishet e shampanjës dhe u dekoruan disa zyrtarë për atë që konsiderohej si hapje e negociatave, ky gëzimi i sotëm i Kryeministrit duket i pavend.
Shumëkush e mban mend sesi në 2018-ën, Rama njoftonte hapjen e negociatave, ndërsa pas tij vinin urimet edhe të diplomatëve, që i tregonin shqiptarëve se i ishin çelur dyert në Bashkimin Europian, edhe pse nga Bundestagu gjerman ishin renditur kushtet që duhej të plotësonte qeveria shqiptare, një pjesë e të cilave as sot e kësaj dite nuk janë plotësuar.
Përballë qëndrimit të mbajtur nga Unioni, Rama zgjodhi në jo pak raste ashpërsimin e toneve, herë duke sulmuar ato që i konsideronte si vendet skeptike, që për interesat e tyre të brendshme, mbanin peng hapjen e negociatave, dhe herë hidhte akuza mbi burokratët e Brukselit. Në raste të tjera paralajmëronte me zgjidhje të tjera, jashtë BE, ku kërcënonte me rrezikun kinez dhe atë rus që kanë influenca në Rajon, por asnjëherë nuk ndërmorri hapat për të përmbushur kushtet, ku primari mbetet ai i zgjedhjeve të lira dhe të ndershme. Në vend të krijimit të një klime që do të mundësonte zgjedhje të lira, Rama shpiku mekanizmin e patronazhistëve, hodhi në treg të dhënat sensistive të qytetarëve, arriti të vinte nën kontroll drejtësinë e re, aq sa sot edhe një nga skandalet më të mëdha, ai i inceneratorëve, është kthyer në një lule “mos më prek”.
Në 9 vitet e pushtetit të Edi Ramës procesi i integrimit në BE është zvarritur, ndërsa sot Kryeministri po përdor ndoshta si mjete presioni ndaj Unionit dy nisma të shumëdebatueshme, atë të legalizimit të kanabisit mjekësor dhe amnistinë fiskale.
Të dy nismat, që Rama me shumë këmbëngulje do të tentojë t´i miratojë në Kuvend mund të prodhojnë përplasje, jo vetëm me Brukselin, por edhe me shumë nga vendet anëtare të Unionit, që ashtu sikundër Bullgaria vendosi veton ndaj Maqedonisë së Veriut, deri në propozimin francez, edhe ata mund të vendosin kushte ndaj Tiranës zyrtare.
Sinjalet nuk kanë munguar, qoftë për legalizimin e kanabisit për qëllime mjekësore, ashtu edhe për amnistinë fiskale. Madje për këtë të dytën kundërshtitë vijnë jo vetëm nga BE, por edhe nga organizmat ndërkombëtare financiare, përfshi edhe ato me qendër në Uashington.
Një ditë më parë, dy nga diplomatët kryesore në Tiranë, ai gjerman dhe homologia e tij franceze, në mënyrë demonstrative braktisën sallën ku po diskutohej mbi amnistinë fiskale, sapo Kryeministri Edi Rama mori fjalën. Më pas dy diplomatët me gjuhë diplomatike thanë se në agjendat e tyre kishte takime të tjera, por ato e kishin shprehur më parë qëndrimin e tyre, që ishte në unison me atë të BE-së.
Një ditë më parë, Kryeministri foli si sovranist, i tregoi deri diku kufinjtë apo vijat e kuqe vendeve që kundërshtojnë amnistinë fiskale, ndërsa nuk dihet nëse do të vijojë me të njëjtin qëndrin edhe javën e ardhshme, dhe sa e pranueshme do të jetë kjo gjuhë e tij nga Brukseli apo vendet anëtare të Unionit.
