Institucionet publike kanë dështuar në përballjen me qytetarët në pjesën më të madhe të proceseve administrative në Gjykatën e Lartë.
Në periudhën prej fillimit të vitit 2021 e deri në qershor të këtij viti, strukturat shtetërore nuk kanë arritur të kalojnë pragun 50 përqind të çështjeve të fituara në shkallën më të lartë të gjyqësorit.
Statistikat janë përpunuar nga Gjykata e Lartë dhe situata dëshmon për abuzimin masiv të institucioneve shtetërore ndaj qytetarëve dhe organizmave privatë.
Gjykata e Lartë mbeti jashtë funksionit për reth 3 vjet dhe u rikthye gradualisht në funksion duke filluar nga Prilli i vitit 2020.
Përgjatë kësaj periudhe, Kolegji Administrativ i Gjykatës së Lartë ka shqyrtuar qindra çështje, të cilat prisnin me vite në tavolinat e institucionit.
Për vitin 2021 testin e pranueshmërisë, pra që përmbushnin kriteret formale ligjore e kanë kaluar me sukses 421 rekurse të paraqitura nga individët/personi juridik privatë (55,3%), kundrejt 340 rekurseve të paraqitura nga organet publike (44,6%).
Po ashtu, edhe për gjashtëmujorin e parë të vitit 2022, testi i pranueshmërisë së rekursit rezulton i suksesshëm për individët/personat juridik privatë.
Sipas statistikave të evidentuara në faqen zyrtare të internetit të Gjykatës së Lartë rezulton se nga 892 vendime të dhëna për zgjidhjen e çështjeve në themel kanë marrë zgjidhje përfundimtare 751 çështje, ndërsa 141 çështje janë kthyer për rigjykim.
Në totalin e këtyre çështjeve, 51,46% i zenë rekurset e paraqitura nga individët/personat juridik privatë, 32,7% janë rekurset e paraqitura nga organet publike.
Ndërsa për çështjet e prishura dhe të kthyera për rigjykim 5,71% janë rekurset e paraqitura nga individët/personi juridik privatë dhe 10,1% janë rekurset e paraqitura nga organet publike.
Duke iu referuar 751 çështjeve që janë zgjidhur përfundimisht nga Kolegji Administrativ, rezulton se testin e pranueshmërisë e kanë kaluar me sukses 459 rekurse të paraqitura nga individi/person juridik privat (61,1%), kundrejt 292 rekurseve të paraqitura nga organet publike (38,9%).
