Një tragjedi u shënua sot në bregdetin shqiptar, ku një i ri humbi jetën në përpjekje për të shpëtuar dy të mitur nga mbytja.
Anri Kashiku ishte 18-vjeçari, që u fut në det për të shpëtuar vëllanë dhe shokun e tij 15-vjeçar të cilët po rrezikonin jetën si pasojë e dallgëve të larta.
I riu bëri një gjest heroik dhe ia doli të nxirrte në breg dy të miturit që tashmë janë jashtë rrezikut për jetën. Megjithatë tragjedia mund të shmangej.
Gazetarët nga vendi i ngjarjes bëjnë me dije se në momentin e ngjarjes, në plazh nuk ka pasur roje bregdetare. Edhe pse në zonë ka kulla, kur ndodhi ngjarja e rëndë ato ishin bosh.
Me praninë e rojes bregdetare, tragjedia mund të ishte shmangur dhe i riu nuk do të kishte humbur jetën në përpjekjen për të shpëtuar dy 15-vjeçarët.
Tragjeditë në bregdetin tonë nuk kanë qenë të pakta dhe më i fundit përbën një alarm të shtuar për rritjen e sigurisë dhe monitorimit në plazhe.
