Nga Boldnews.al
Nëse doni të kuptoni gjendjen e Rilindjes, që po kallet nga korrupsioni i vet, mjafton që të marrësh në analizë sjelljen e dy personazheve më të lartë që ka PS, Edi Ramën kryeministr, dhe Erion Veliajn, kryebashkiak të Tiranës. Nëse njëri hesht si “gurë varri”, tjetri çirret çdo çast në deklarata shtypi, statuse në rrjetet sociale, konferenca dhe takime, mjafton që të zaptojë pjesën publike në media.
Rama ka një javë që hesht, nuk dihet nga është dhe ku pritet të shkojë në ndonjë takim jashtë vendit, vetëm e vetëm të ikë nga ajo që ka lënë këtu… Që pas protestës së madhe të 7 korrikut të thirrur nga opozita dhe më pas skandaleve të shumta të aferës korruptive të inceneratorëve, Rama nuk është shfaqur më, por Veliaj nxin çdo ditë me daljet e tij, në tentativë për të “zbardhur” me propagandë llumin që ka përfshirë qeverinë, por drejtëpërdrejtë edhe bashkinë.
Dy ditë më parë në Manëz, pranë rezidencës së Muxhahedinëve iranianë, humbi jetën në punë një 63-vjeçar, punonjës i pastrimit. Ai u copëtua nga makina e mbetjeve dhe policia lokale e Tiranës heshti për disa orë, deri kur lajmi u bë publik nga media. Pak portale e publikuan, ndërsa mediat e mëdha heshtën si “gurë varri”, pasi Lali dhe Rama nuk duhet të preken. Është rasti i dytë që në kohën që qeveris Veliaj ndodhin aksidente me pasojë vdekjen. Ishte vetëm 17 vjeç Ardit Gjoklaj kur humbi jetën në mënyrën më makabre të mundëshme ndërsa punonte në landfillin e Sharrës.
Pa kushte tenknike dhe mbi të gjitha në punë të zezë, pasi nuk kishte mbushur moshën për punë, adoleshenti që priste të mbaronte maturën vdiq në Sharrë. Veliaj ia hodhi fare lehtë, qoftë edhe duke bërë “celebruesin” e djalit të një prokurori, që pas “ahengut politik” se ku e degdisi këtë dosje që u mbyll me dënimin pak vite të ekskavatoristit.
Po rasti i djeshëm a po hetohet nga Inspektoriati i Punës, apo nga Prokuroria e Tiranës? Me siguri një dosje do të bëhet, por po me aq siguri mund të thuhet se ishte vetëm një “aksident”, ku si gjithnjë viktimës i vihet faji.
Kështu ndodh edhe me punëtorët e ndërtimit që humbin jetën nga lartësitë e kullave që prej kohësh i kanë marrë frymën Tiranës.
Sikur të mos mjaftonte drama njerëzore me humbje jetësh, por edhe aferën e rëndë të inceneratorëve ku Veliaj ka hedhur firmën, ai del publikisht dhe mburret se: Po, do të ketë beton e llaç në Tiranë, pasi kryeqyteti shtohet, sipas tij me mbi 30 mijë qytetarë në vit që vijnë nga rrethet e tjera të vendit.
Pallate dhe kulla plot po ndërtohen, por të gjithë e dinë se ato nuk mund të jenë streha e këtyre të rinjve që kryesisht vijnë si studentë dhe më pas nuk kthehen në vendlindje, pikërisht për shkak të mungesës së mundësive, bujqësisë së rrënuar, apo papunësisë në qytezat e tyre, ku nëse nuk je Rilindas, punën në shtet as në ëndërr nuk mund ta shohësh.
Pikërisht mburrja me “oligarkinë e ndërtimit” nga Veliaj është treguesi se çdo gjë tashmë po kap fundin.
Korrupsioni nis nga lindja deri në vdekje. Drejtor i emëruar nga Bashkia Tiranë ishte ai që bënte pazar edhe për një copë varr, duke kërkuar në formë korrupsioni nga 500-2000 euro.
Punëtor fatkeq ishte ai 63-vjeçar që mbytej në erën e rëndë të mbetjeve urbane dhe paguhej sa për të mbajtur frymën gjallë, por për shkak të mungesës së sigurisë në punë, ai nuk është më i gjallë, ndërsa kreu i Bashkisë as që e përmend si rast, qoftë edhe me një mesazh të shtirur ngushëllimi.
Të vdekurit nuk po i lenë të qetë nën dhe’ duke i bërë miliarderë në skemën më të frikshme të korrupsionit në krijimin e kompanive fantazëm që me fatura fiktive të TVSH-së kanë rrëmbyer 189 milionë euro.
Kjo skemë e frikshme është e lidhur me inceneratorin e Tiranës, ku Lali mburret se është investimi më serioz, ku vetëm incenerim (djegie) nuk ka, por paguhet si për incenerim me taksat tona. Të gjitha këto rëndojnë, por Veliaj sot asnjë fjalë nuk tha, duke u çuar “selam” ndërtuesve se ata janë “fryma” e tij e zhvillimit.
A i mbulon betoni i oligarkisë vdekjet, korrupsionin, aferat dhe malinjitetin e një qeverisje?
Deri tani ia kanë dalë, më pas të shohim. Gjithsesi shenja e parë që Rilindja nuk është mirë duket nga qepja e gojës së kreut të qeverisë dhe llomotitja pa fund e limit e kreut të bashkisë.
