Vrasësi i dyshuar i ish-kryeministrit japonez Shinzo Abe është transferuar, pasi u mbajt në një stacion policie për dy ditë. Policia thotë se i dyshuari 41-vjeçar tha se ai kishte besuar thashethemet se Abe ishte i lidhur me një organizatë fetare që i shkaktonte probleme financiare familjes së tij.
Ai gjithashtu u tha hetuesve se kishte tentuar të prodhonte një bombë. Ndërkohë një armë e punuar me dorë e gjetur në vendngjarje.
Përtej detajeve të ngjarjes së rëndë, vdekja e Abes ka ngritur pikëpyetje për sigurinë. Një zyrtar i lartë i policisë ka pranuar se gabimet e mundshme të sigurisë i lejuan atentatorit t’i afrohej kryeministrit në mes të ditës.
“Unë besoj se është e pamohueshme që ka pasur probleme me masat e ruajtjes dhe sigurisë. Është urgjente që ne të bëjmë një hetim të plotë për të sqaruar se çfarë ka ndodhur,” tha Tomoaki Onizuka, kreu i policisë prefekturale të Narës.
Abe është vlerësuar për njohuritë dhe përvojën e tij në politikën ndërkombëtare dhe për parandalimin e përkeqësimit të marrëdhënieve SHBA-Japoneze.
Ndërsa vrasja ka lënë në hije zgjedhjet parlamentare të së dielës, Partia Liberal Demokratike parashikohet të dalë fituese.
Kryeministri aktual japonez, Fumio Kishida, i cili drejton partinë konservatore, denoncoi sulmin “barbar” ndaj ish-mentorit të tij, duke këmbëngulur në rëndësinë e “mbrojtjes së zgjedhjeve të lira dhe të ndershme”.
